Bazalwane Betfu Labatsandzekako:

Njengobe sitikhonti taJehova siyalitsandza liVi lakhe liBhayibheli. Siyaciniseka kutsi linemlandvo loliciniso, singaletsemba kutsi lingasicondzisa ekuphileni, futsi linebufakazi lobutsintsa inhlitiyo bekutsi Jehova uyabatsandza bantfu. (Tihlabelelo 119:105; Lukha 1:3; 1 Johane 4:19) Sitimisele kusita labanye kutsi nabo bawati lamaciniso laligugu laseBhayibhelini. Ngaleso sizatfu, siyajabula kunatisa kutsi lencwadzi letsi, “Tifundvo Longatifundza EBhayibhelini” seyiyatfolakala. Sicela kukuchazela kafishane ngalencwadzi.

Incenye lenkhulu yalencwadzi ilungiselelwe kucatjangwa bantfwana. Nanobe kunjalo, ingasetjentiswa nangulabadzala labanesifiso sekufundza lokunyenti ngeliBhayibheli. Njengobe liBhayibheli liyincwadzi yabo bonkhe bantfu, asingabati kutsi sitawuzuza ngekubuketa letifundvo letitasisita sijabule.

Ikhuluma ngekulandzisa lokuseBhayibhelini, lencwadzi isitjela ngemndeni webantfu kusukela ekudalweni kwetintfo. Minyenti imetamo leyentiwe kuze lokulandzisa lokuseBhayibhelini kucace futsi kuvakale ngendlela lokulandzelana ngayo.

Lencwadzi ayigcini nje ngekusitjela tindzaba letiseBhayibhelini, kepha loko lokubhaliwe kanye netitfombe letikuyo kwenta lendzaba iphile futsi kwenta ubone indlela labebativa ngayo labo labavetwe etitfombeni.

Lencwadzi itasisita sibone kutsi kungani liBhayibheli liyincwadzi lekhuluma ngebantfu​—labalalela Jehova nalabangazange bamlalele. Lencwadzi isikhutsata kutsi sitfole tifundvo etibonelweni talabantfu. (Roma 15:4; 1 Khorinte 10:6) Lencwadzi yehlukaniswe  yaba tincenye letingu-14. Ekucaleni kwencenye ngayinye kucocwa kafushane ngetifundvo lesitatifundza kuleto tehluko.

Nangabe ungumtali, ningafundza sehluko futsi nicoce ngetitfombe letikuso nemntfwana wakho. Ningaphindze nifundze nemiBhalo lecashuniwe lokusekelwe kuyo lesehluko. Sita umntfwana wakho abone kutsi loko lakufundze eBhayibhelini kuhlobana njani nalakufundze kulencwadzi. Ungasebentisa indlela lefanako nawusita umuntfu lomdzala kutsi awati kahle umlayeto loseBhayibhelini.

Siyetsemba kutsi lencwadzi itawusita bonkhe labo labafuna kwati liciniso​—labadzala nalabancane—​kutsi bafundze liVi laNkulunkulu futsi balisebentise ekuphileni kwabo. Umphumela utawuba kutsi nabo batawukhonta Jehova njengemalunga emndeni wakhe lonelutsandvo.