Anangɛso wa ngandji le,

Oko weso atɛmɔdi wa Jehowa, sho nangaka Ɔtɛkɛta ande, Bible. Sho nshikikɛka dia tɔ kekɔ l’ɛkɔndɔ w’eshika, mbishaka ɛlɔmbwɛlɔ k’oshika lo lɔsɛnɔ ndo kekɔ djembetelo yananda otema ya ngandji ka Jehowa otsha le nkumbo k’anto. (Osambo 119:105; Luka 1:3; 1 Joani 4:19) Tekɔ la nsaki k’efula ka nkimanyiya anto akina dia vɔ mbeka akambo wa mɛtɛ w’oshinga wolo watanema l’Ɔtɛkɛta wa Nzambi. Dia nsala dui sɔ, tekɔ l’ɔngɛnɔngɛnɔ w’efula wa ntondja dibuku nɛ diele l’ɔtɛ a dui ɔnɛ, “Wetshelo wakokayɛ nkondja oma lo Bible.” Lam’alangayɛ, etawɔ dia sho kotɛ yema y’akambo wendana la diɔ.

Lo tshɛ kadiɔ, dibuku nɛ diakalɔngɔsɔma dia nkimanyiya ana. Koko, diɔ koka nto nkimanyiya ndo epalanga wakombola mbeka akambo efula wendana la Bible. Ndo lam’ele Bible ekɔ dibuku di’onto tshɛ, aha la taamu sho tshɛ tayokondja wahɔ lo vusolaka wekelo wa lɔkɔ wakoka tokimanyiya dia sho monga mɛtɛ l’ɔngɛnɔngɛnɔ.

Lo nkamba l’ɛkɔndɔ w’oma lo Bible, dibuku nɛ totɛka ɔkɔndɔ wendana la nkumbo k’anto oma k’etatelo k’etongelo. Welo tshɛ wakadjama wa ntondja ɛkɔndɔ w’oma lo Bible lo yoho yokɛma hwe, yele wɔdu ndo yakoka lo ndjela woho wakawayahɔnaka.

Koko dibuku nɛ hakomɛ tsho lo nkɔndɔla ɛkɔndɔ wele lo Bible. Efundelo la esato wa lɔkɔ wakalɔngɔsɔma lo yoho yatokimanyiya dia monga oko anto wɛna awui wɔtɛkɛtami ndo sho ndjaoka woho wakayaoke wanɛ wɔtɛkɛtami.

Okanda ɔnɛ tokimanyiyaka dia sho mɛna woho wele Bible dibuku diendana la anto wakakitanyiyaka Jehowa ndo wanɛ waki kombokitanyiyaka. Ndo diɔ tokimanyiyaka dia sho nkondja wetshelo oma lo bɛnyɛlɔ diawɔ. (Rɔmɔ 15:4; 1 Kɔrɛtɔ 10:6) Dibuku nɛ kahanyema lo tenyi 14. L’etatelo ka etenyi tshɛ, ekɔ awui wa lo tshena pe amɔtshi wendana la wetshelo wakokaso nkondja.

 Naka wɛ ekɔ ombutshi, wɛ pombaka mbadia wekelo ɔmɔtshi kaamɛ la ɔnayɛ ndo kɛtshanya la nde osato wɔtɔnɛ la wekelo akɔ. Ko oma laasɔ, ɔmɔtshi l’atei anyu kokaka mbadiaka avɛsa wa lo Bible wɔsami wekelo akɔ. Kimanyiya ɔnayɛ la pami kana la womoto dia nde mbɔtɔnganyiya kɛnɛ kadɛnde lo Bible la wekelo wele lo dibuku nɛ. Yoho shɔ yayoleka monga l’etombelo w’amɛna etena kokimanyiya opalanga ɔmɔtshi dia nde mvusola nkanyi y’otondo ya losango la lo Bible.

Tekɔ l’elongamelo dia okanda ɔnɛ ayokimanyiya anto tshɛ w’etema ɛlɔlɔ, mbuta ate akɛnda ndo epalanga dia mbeka Ɔtɛkɛta wa Nzambi ndo nkamba la wekelo wa lɔkɔ lo nsɛnɔ yawɔ. Etombelo wayonga ele, vɔ lawɔ nto wayokoka ntɛmɔla Nzambi oko anto wa lo nkumbo kande wokande ngandji.