Siʻi Kaungātui:

ʻI hotau tuʻunga ko e kau lotu ʻa Sihová, ʻoku tau ʻofa ʻi heʻene Folofolá, ʻa e Tohi Tapú. ʻOku mau tuipau ʻoku tokonaki mai ai ʻa e hisitōlia totonu, tataki alafalalaʻanga ki he moʻuí, mo e fakamoʻoni fakalotomāfana ʻo e ʻofa ʻa Sihova ki he fāmili ʻo e tangatá. (Saame 119:105; Luke 1:3; 1 Sione 4:19) ʻOku mau holi lahi ke tokoniʻi ʻa e niʻihi kehé ke nau ʻilo ʻa e ngaahi moʻoni mahuʻinga ʻoku ʻi he Folofola ʻa e ʻOtuá. Ke aʻusia iá, ʻoku mau fiefia ʻaupito ke ʻai ke ala maʻu ʻa e tohí ni, Ngaahi Lēsoni ʻe Lava Ke Ke Ako mei he Tohi Tapú. Tuku ke mau tala atu ha meʻa fekauʻaki mo ia.

ʻI he tuʻunga lahi tahá, kuo teuteuʻi ʻa e tohí ni fakataha mo e fakakaukau ki he fānaú. Kae kehe, ʻe toe lava foki ke ne tokoniʻi ʻa e kakai lalahi ʻoku nau holi ke ʻilo lahi ange ki he Tohi Tapú. Pea koeʻuhi ko e Tohi Tapú ko ha tohi ia maʻá e tokotaha kotoa, ʻoku ʻikai ha veiveiua te tau maʻu ʻaonga kotoa mei hono fakamanatu ʻa e ngaahi lēsoni ʻi aí, ʻa ia ʻe lava ke ne tokoniʻi kitautolu ke tau fiefia moʻoni.

ʻI he ngāueʻaki ʻa e ngaahi talanoa mei he Tohi Tapú, ʻoku talanoa ʻa e tohí ni ki he fāmili ʻo e tangatá mei he fakatupú ʻo faai mai ai. Kuo fai ʻa e feinga lahi ke ʻoatu ʻa e ngaahi talanoa ʻi he Tohi Tapú ʻi ha founga mahino mo faingofua, pea ʻi heʻene malavá, ʻi he fakahokohoko ʻa ia naʻe hoko moʻoni aí.

Kae kehe, ko e tohí ni, ʻokú ne ʻomai ʻa e meʻa lahi ange ʻi he fakamatala pē ki he ngaahi talanoa Fakatohitapú. Ko e fakamatalá mo e fakatātaá kuo teuteu ia ʻi ha founga ʻoku ʻai ai ke maeʻeeʻa ʻa e ngaahi talanoa Fakatohitapú peá ne tohoakiʻi mai ʻa e ongoʻi ʻa e faʻahinga ʻi he fakatātaá.

ʻOku tokoniʻi kitautolu ʻe he tohí ni ke tau sio ki he founga ʻoku hoko ai ʻa e Tohi Tapú ko ha tohi fekauʻaki mo e kakai​—ko e faʻahinga naʻa nau talangofua kia Sihova mo e faʻahinga naʻe ʻikai. Pea ʻokú ne ueʻi kitautolu ke tau maʻu ha lēsoni mei heʻenau faʻifaʻitakiʻangá. (Loma 15:4; 1 Kolinitō 10:6) ʻOku vahevahe ʻa e tohí ni ki he konga ʻe 14. ʻI he kamataʻanga ʻo e  konga taki taha ʻoku ʻi ai ha fakamatala fakanounou ʻo e ngaahi lēsoni ʻe niʻihi ʻe lava ke tau ako.

Kapau ko ha mātuʻa koe, ʻe lava ke ke lau ha lēsoni mo hoʻo kiʻi tamá pea lāulea ki he fakatātā felāveʻi mo iá. ʻE lava leva ke mo lau ʻa e kupu ʻi he Tohi Tapú ʻoku fakatefito ai ʻa e lēsoní. Tokoniʻi hoʻo kiʻi tamá ke ne fakahoa ʻa e meʻa ʻokú ne lau ʻi he Tohi Tapú mo e lēsoni ʻi he tohí. Ko ha founga meimei tatau ʻe ola lelei nai ia ʻi hano tokoniʻi ha tokotaha lahi ke ne maʻu ʻa e vakai fakalūkufua ki he pōpoaki ʻi he Tohi Tapú.

Ko ʻemau ʻamanakí ia ʻe tokoniʻi ʻe he tohí ni ʻa e faʻahinga loto-totonú kotoa​—ʻa e iiki mo e lalahi—​ke nau ako mei he Folofola ʻa e ʻOtuá pea ke ngāueʻaki ʻi heʻenau moʻuí ʻa e ngaahi lēsoni ʻi aí. Ko hono olá, ko kinautolu foki ʻe lava ke nau lotu kiate ia ʻi he tuʻunga ko e ngaahi mēmipa ʻo hono fāmili ʻofeiná.