Kinatalankan tiku kkapaxkiyan:

Tiku kakninaniyaw Jehová paxkiyaw xTachuwin, Biblia. Kanajlayaw pi limin tuku xaxlikana lanit, lakwan tastakyaw tuku kinkamakgtayan kkilatamatkan chu tuku masiya pi Jehová kapaxki latamanin (Salmo 119:105; Lucas 1:3; 1 Juan 4:19). Xlikana kkamakgtayaputunaw amakgapitsi nalakgapaskgo xaxlikana nema lu xtapalh tatekgsa kxTachuwin Dios. Wa xlakata klipaxuwayaw nakkamasiyaniyan uma libro: «Tuku tlan nakatsiniya kBiblia». Kakilamaxkiw talakaskin nakkalitachuwinanan tsinu xlakata uma libro.

Uma libro katlawanikanit kamanan. Pero na tlan nakamakgtaya tiku laklankata nema tlakg katsiniputunkgo xlakata Biblia. Chu xlakata Biblia maktum libro nema litamakgtayakgo putum latamanin, xlikana pi putum nalitamakgtayayaw komo nalikgalhtawakgayaw tuku kinkamasiyaniyan uma libro, xlakata tlan nakinkamakgtayayan napaxuwayaw.

Uma libro lichuwinan la titaxtutilhanit latamat lata malakatsukinanka, chuna la wan Biblia. Liskujkanit xlakata namatitaxtikan tuku wan Biblia chuna la ni tuwa chu liwana naʼakgatekgskan, chu wilikanit chuna la latilhanit.

Pero uma libro ni kajwatiya lichuwinan tuku lanit makgasa nema min kBiblia. Tuku tatsokgnit chu dibujos nema limin lakkaxwilikanit xlakata tuku lichuwinan Biblia naʼakxilhaw kkintalakapastaknikan chu nakatsiyaw la xmakgkatsikgo tiku kalichuwinankan.

Uma likgalhtawakga kinkamakgtayayan naʼakxilhaw pi Biblia maktum libro nema lichuwinan latamanin: tiku kgalhakgaxmatkgolh Jehová chu tiku ni. Xliʼakxilhtitkan na kinkamakgtayayan wi tuku nakatsiniyaw (Romanos 15:4; 1 Corintios 10:6). Libro tapitsinit k14 secciones. Niku tsuku akgatunu sección, wi akgtum resumen xla makgapitsi tuku tlan nakatsiniyaw.

 Komo kgalhiya kamanan tlan nakalitakgalhtawakgaya akgtum capítulo, chu akxtum nalichuwinanatit dibujos. Alistalh tlan nalikgalhtawakgayatit texto xalak Biblia niku takilhtinit capítulo. Kakamakgtaya minkamanan naʼakxilhkgo la tatalakxtumi tuku wan Biblia chu tuku masiya akgatunu capítulo xla libro. Na tlan chuna natlawakan xlakata namakgtayakan tiku lankata nakatsini tuku xalak Biblia.

Klakaskinaw pi uma likgalhtawakga kakamakgtayalh latamanin tiku tlan likatsikgo, lata tiku laktsujku chu tiku laklankata, nakatsinikgo xla xTachuwin Dios chu nalilatamakgo tuku masiya. Chuna xlakan na tlan nakakninanikgo Jehová chu namakgtapakgsikgo kxfamilia.