Eka Vapfumerikulorhi:

Leswi hi nga vagandzeri va Yehovha, hi rhandza Rito ra yena ku nga Bibele. Ha tiyiseka leswaku yi ni matimu lama pakanisaka ni nkongomiso lowu hi nga wu tshembaka evuton’wini. Nakambe yi ni vumbhoni lebyi khumbaka mbilu bya ndlela leyi Yehovha a hi rhandzaka ha yona. (Pisalema 119:105; Luka 1:3; 1 Yohane 4:19) Hi swi navela hi mbilu hinkwayo ku pfuna van’wana leswaku va dyondza ntiyiso lowu nga eRitweni ra Xikwembu. Hikwalaho ka sweswo, ha tsaka ku humesa buku leyi nge Leswi U Nga Swi Dyondzaka eBibeleni. I nge hi mi chumbutela swo karhi hi buku leyi.

Hambileswi buku leyi yi endleriweke vana, yi nga ha tirhisiwa ku pfuna vanhu lavakulu lava tsakelaka ku dyondza swo tala hi Bibele. Nakambe tanihi leswi Bibele yi nga buku ya vanhu hinkwavo, hinkwerhu ka hina hi ta vuyeriwa loko hi kambisisa tidyondzo ta buku leyi naswona sweswo swi ta hi tsakisa.

Buku leyi yi vulavula hi swiendlakalo leswi nga kona eBibeleni. Ku endliwe matshalatshala leswaku rungula ra buku leyi ri hlayeka hi ku olova ni hi ndlela leyi twisisekaka naswona swiendlakalo swa kona swi longoloxiwe hi ndlela leyi swi humeleleke ha yona eBibeleni.

Hambiswiritano, buku leyi a yo hlamusela marungula ya le Bibeleni ntsena. Rungula ni swifaniso swa yona swi endla leswaku muhlayi a swi vona hi mahlo ya mianakanyo leswi a swi ri eku endlekeni hi nkarhi wolowo.

Buku leyi yi hi hlamusela hi vanhu va le Bibeleni lava yingiseke Yehovha ni lava nga n’wi yingisangiki. Naswona yi nga hi pfuna ku dyondza swo karhi eka swikombiso swa vona. (Varhoma 15:4; 1 Vakorinto 10:6) Buku leyi yi avanyisiwe hi swiyenge swa 14. Xiyenge xin’wana ni xin’wana loko xi sungula xi katsakanya tidyondzo leti hi nga ti dyondzaka.

 Loko u ri mutswari, u nga ha dyondza dyondzo yo karhi ni n’wana wa wena kutani mi bula hi swifaniso swa dyondzo yoleyo. Endzhaku ka sweswo mi nga hlaya tindzimana ta Bibele leti rungula rero ri humaka eka tona. Pfuna n’wana wa wena ku vona ndlela leyi rungula ra le Bibeleni ri fambisanaka ha yona ni rungula ra buku leyi. U nga ha endla leswi fanaka leswaku u kota ku pfuna munhu lonkulu ku twisisa rungula ra Bibele.

Hi navela leswaku buku leyi yi pfuna vanhu hinkwavo lavakulu ni lavatsongo, lava nga ni timbilu letinene leswaku va dyondza eRitweni ra Xikwembu ni ku tirhisa leswi va swi dyondzaka evuton’wini bya vona. Kutani na vona va ta kota ku gandzela Yehovha.