Эргим өңнүктер!

Бис Иегованың бараалгакчылары болгаш, ооң Сөзүнге, Библияга, ынак бис. Библия — төөгү талазы-биле ылап шын, чуртталганың бүзүрелдиг орук айтыкчызы база Иегованың кижилерге өскерилбес ынакшылының бадыткалы деп шынзыккан бис (Ырлар 118:105; Лука 1:3; 1 Иоанн 4:19). Бурганның Сөзүнде бар үнелиг алыс шынны өскелерге билип алырынга аажок дузалажыксап турар бис. Ол сорулга-биле «Ыдыктыг Бижилгеде төөгүлерден өөрен» деп номну белеткээн бис. Ооң дугайында кысказы-биле чугаалап бээрин чөпшээреңер.

Бо номну колдуунда бичии номчукчуларга белеткеп каан. Ынчалза-даа ол Библияны эки билип алыксап турар улуг улуска база солун боор. А Библия кижи бүрүзүнге ном болганда, бо номда кичээлдер шупту улуска ажыктыг.

Мында кижилерни чаяаганындан тура төөгүнү бижээн. Библияда болуушкуннарны бөдүүн, билдингир болгаш канчаар болуп турганы ёзугаар дамчыдарын кыскан бис.

Бо номда Библияның анаа-ла утказын дамчытпаан. Мында сөзүглел болгаш чуруктар библейжи болуушкуннарны диригжидеринге, ооң маадырларының минниишкиннерин тода билип алырынга дузалап турар.

Бо номну номчуп тургаш, Библияда Иеговага дыңнангыр база дыңнангыр эвес чораан улустуң дугайында төөгүлерни билип алыр силер. Бо ном оларның чижээнден эки кичээлдерни шиңгээдип алырынга дузалаар (Римчилерге 15:4; 1 Коринфичилерге 10:6). Мында 14 кезек бар. Кезек эгезинде-ле чамдык кичээлдерниң кол бодалдарын сайгарып каан.

 Бо номну төлүңер-биле кады номчуп турар болзуңарза, эгезинде кичээлди номчааш, чуруктарны сайгарыңар. Соонда бердинген библейжи үзүндүлерни кады номчуңар. Төлүңер кичээл бүрүзүн Бурганның Сөзүнге үндезилээн деп көрүп каар кылдыр, аңаа дузалаңар. Библияның кол утказын билип алыксап турар улуг улус база ынчаар кылып болур.

Бо ном ак сеткилдиг улуг-даа, бичии-даа улуска Библияны эки билип алырынга база ооң өөредиглериниң аайы-биле чурттаарынга дузалаар деп идегээр-дир бис. Ынчаар олар Бурганның найыралдыг өг-бүлезиниң кежигүннери апарып болур.