Ha Vhatendi Nga Rine Vha Funwaho:

Sa vhagwadameli vha Yehova, ri funa Ipfi ḽawe, Bivhili. Ri na vhungoho ha uri ḽi ṱalutshedza ḓivhazwakale nga nḓila yo teaho, u ṋea vhulivhisi ha kutshilele vhune ra nga vhu fulufhela na vhuṱanzi vhu fushaho ha uri Yehova u funa vhathu. (Psalme ya 119:105; Luka 1:3; 1 Yohane 4:19) Ri takalela vhukuma u thusa vhaṅwe u guda nga ha mafhungo ngoho a re Ipfini ḽa Mudzimu. Nga zwenezwo, ri a takala vhukuma u vha hone ha ino bugu ine ya ri “Zwine Ra Nga Zwi Guda Bivhilini.” Kha ri ambe zwiṱuku nga hayo.

Zwipiḓa zwinzhi zwa ino bugu zwo lugiselelwa ho livhiswa ṱhogomelo kha vhana. Fhedzi i nga dovha ya thusa vhathu vhahulwane vhane vha ṱoḓa u guda zwo engedzeaho nga ha Bivhili. Nahone samusi Bivhili i bugu yashu roṱhe, a zwi timatimisi uri roṱhe ri ḓo vhuyelwa nga u vhala ngudo dzayo, dzine dza ḓo ri thusa u vha vhathu vho takalaho vhukuma.

I tshi shumisa mafhungo a re Bivhilini, ino bugu i amba nga ha vhathu u bva tsikoni u ya phanḓa. Ho itwa vhuḓidini ha u ṱalutshedza mafhungo a re Bivhilini nga nḓila i pfalaho na i leluwaho na nga u tevhekana hao nga hune zwa konadzea ngaho.

Naho zwo ralo, ino bugu a i sokou ṱalutshedza mafhungo a Bivhilini fhedzi. Maipfi na zwifanyiso zwo dzudzanywa nga nḓila ine zwa ita uri mafhungo a Bivhili a pfale zwavhuḓi nahone zwa sumbedza maḓipfele a vhathu vho fanyiswaho.

Ino bugu i ri thusa u vhona nḓila ine Bivhili ya nga vha ngayo bugu i ambaho nga ha vhathu—vhe vha thetshelesa Yehova na vhe vha si mu thetshelese. Nahone i ri ṱuṱuwedzela uri ri gude kha tsumbo dzavho. (Vharoma 15:4; 1 Vhakorinta 10:6) Heyi bugu i na zwipiḓa  zwa 14. Mathomoni a tshipiḓa tshiṅwe na tshiṅwe hu na dziṅwe dza gundo dzine ra nga dzi wana nga u tou pfufhifhadza.

Arali ni mubebi, ni nga vhala ngudo na ṅwana waṋu nahone ni haseledze na zwifanyiso zwi tshimbidzanaho nayo. Ni vhale na ṅwana waṋu ndimana dza Bivhili dze ngudo ya thewa khadzo. Thusani ṅwana waṋu u vhona uri zwine a khou zwi vhala Bivhilini zwi tshimbidzana hani na ngudo i re kha bugu. Maitele a fanaho a nga thusa mualuwa u pfesesa mulaedza wa Bivhili.

Ri fulufhela uri ino bugu i ḓo thusa vhoṱhe vha mbilu dzavhuḓi—vhaṱuku na vhahulwane—u guda kha Ipfi ḽa Mudzimu na u shumisa zwe vha guda vhutshiloni havho. Zwenezwo zwi ḓo ita uri navho vha vhe miraḓo ya muṱa wawe une a u funa.