Hinigugma nga mga Igkasi-tumuroo:

Sugad nga mga magsiringba ni Jehova, hinigugma naton an iya Pulong, an Biblia. Kombinsido kita nga naghahatag ito hin husto nga impormasyon may kalabotan ha kasaysayan, masasarigan nga giya ha pagkinabuhi, ngan makaparig-on nga mga ebidensya han gugma ni Jehova ha mga tawo. (Salmos 119:105; Lucas 1:3; 1 Juan 4:19) Karuyag gud naton buligan an iba nga mahibaro han importante nga mga kamatuoran nga aada ha Pulong han Dios. Tungod hito, nalilipay gud kami nga ipublikar ini nga libro, Mga Leksyon nga Imo Mahibabaroan Tikang ha Biblia. Ini an pipira nga impormasyon mahitungod hini nga libro.

An kadak-an nga bahin hini nga libro gindisenyo para ha kabataan. Pero puydi liwat ini gamiton ha pagbulig ha mga adulto nga naruruyag mahibaro hin dugang pa mahitungod ha Biblia. Ngan tungod kay an Biblia usa nga libro para ha ngatanan, sigurado nga kita ngatanan magpapahimulos ha pag-usisa utro han mga leksyon hito nga mabulig ha aton nga magin tinuod nga malipayon.

Gamit an mga asoy tikang ha Biblia, iginsusumat hini nga libro an kasaysayan han tawhanon nga pamilya tikang ha paglarang. Ginhimo an ngatanan basi maipresenta an mga asoy ha Biblia ha matin-aw ngan simple nga paagi ngan, tubtob nga posible, uyon ha pagkasunod-sunod hito.

Pero ini nga libro diri la kay nagsusumat han mga asoy ha Biblia. An mga impormasyon ngan an mga retrato hini ginhimo ha paagi nga magin buhi ha hunahuna an mga asoy ha Biblia ngan makita an mga emosyon han mga tawohan.

Ini nga publikasyon nabulig ha aton nga masabtan kon kay ano nga an Biblia usa nga libro mahitungod ha mga tawo​—adton sumugot kan Jehova ngan adton waray. Nag-aaghat ini ha aton nga mahibaro hin mga leksyon ha ira mga ehemplo. (Roma 15:4; 1 Corinto 10:6) Ini nga libro may 14 nga  seksyon. Ha tinikangan han tagsa nga seksyon, may sumaryo han pipira nga leksyon nga aton mahibabaroan.

Kon usa ka nga kag-anak, puydi ka magbasa hin usa nga leksyon kaupod han imo anak ngan hisguti an mga retrato dida hito. Tapos, puydi niyo basahon an mga teksto ha Biblia nga ginbasaran han leksyon. Buligi an imo anak nga hibaroan an koneksyon han iya ginbasa ha Biblia ha mga leksyon nga aada ha libro. Ini nga paagi mahimo liwat magin epektibo ha pagbulig ha usa nga adulto nga mahibaro han kabug-osan nga mensahe han Biblia.

Naglalaom kami nga ini nga publikasyon makabulig ha ngatanan nga may husto nga disposisyon​—batan-on ngan lagas—​nga mahibaro ha Pulong han Dios ngan mag-aplikar han mga leksyon hito ha ira kinabuhi. Sugad nga resulta, mahimo liwat hira makagsingba kan Jehova sugad nga membro han iya hinigugma nga pamilya.