Ŵakunonyelwa Ŵakulupilila Acimjetu:

M’weji mpela ŵakulambila ŵa Yehofa, tukusaganonyela Maloŵe gakwe gagali Baibulo. Tuli ŵakusimicisya kuti Baibulo jikusatukamucisya kumanyilila yindu yisyesyene yayatendekwaga kala, soni jili buku jampaka tujijegamile mnope kuti jitulongoleleje paumi wetu. Baibulo jikusatupasoni umboni wakulosya kuti Yehofa akusiŵanonyelaga ŵandu. (Salimo 119:105; Luka 1:3; 1 Yohane 4:19) Tuli ŵakusacilila mnope kwakamucisya ŵane kulijiganya usyesyene wapenani wawukusasimanikwa m’Maloŵe ga Mlungu. M’yoyo, tuli ŵakusangalala mnope kwapa buku jakuti, Ana Mpaka Apate Majiganyo Gamtuli M’Baibulo? Kwende tulole yindu yine yayili m’bukuji.

M’mbali syejinji sya m’bukuji asilembile pakwaganicisya ŵanace. Nambope mpaka syakamucisyesoni ŵacikulile ŵakusaka kulijiganya yejinji yakwamba Baibulo. Pakuŵa Baibulo jili buku ja wosope, yili yangakayikasya kuti wosopewe mpaka jitukamucisye. Patukulola majiganyo ga m’Baibulo, mpaka gatukamucisye kuŵa ŵakusangalala yisyesyene.

Pakamulicisya masengo ngani sya m’Baibulo, bukuji jikulondesya ya ngani sya ŵandu kutandila pakupanganyidwa kwa yindu kwawula msogolo. Tulinjile kutagulila nganisi mwakupikanika cenene, mwakamulanasoni ni ndaŵi jayatendekwaga yinduyo.

Bukuji ngaŵa kuti jikwamba kutagulila ngani sya m’Baibulope. Nambo ngani syakwe soni yiwulili ayipanganyisye mulitala lyakuti tuyiwoneje munganisyo mwetu yayatendekwagayo, soni muŵapikanilaga mumtima ŵandu ŵakwatagulilawo.

Bukuji cijitukamucisye kumanyilila yajikusasala Baibulo pakwamba ya ŵandu ŵaŵampikanile Yehofa soni ŵanganampikanila. Cijitukamucisyesoni kulola yatukulijiganya kutyocela kwa jemanjaji. (Aloma 15:4; 1 Akolinto 10:6) Bukuji jikwete mbali 14. Kundanda kwa mbali  jilijose kwana kangani kakata kakakutagulila majiganyo gacitulijiganye mu mbalijo.

Naga ali nangolo, komboleka kuŵalanga lijiganyo limo yalumo ni mwanace jwawo kaneko nikutagulilana yiwulili yakamulana ni nganijo. Kaneko mpaka aŵalanjilesoni yalumo kwajityocele nganijo m’Baibulo. Amkamucisye mwanacejo kulola kamulana kwa yaŵalasile m’Baibulo ni lijiganyo lya m’bukuji. Kombolekasoni kamulicisya masengo litalali pakumkamucisya mundu jwacikulile kuti amanyilile utenga wa m’Baibulo.

Tukwete cikulupi cakuti bukuji cijakamucisye ŵandu ŵambone mitima, ŵacinandipile ni ŵacikulile ŵakwe, kulijiganya Maloŵe ga Mlungu ni kugakamulicisya masengo paumi wawo. Yakuyicisya yakwe mpaka yiŵe yakuti jemanjaji mpaka amlambileje Mlungu mpela ŵandu ŵa m’liŵasa lyakwe.