Sukuʼuneʼex yéetel kiikeʼex:

Toʼon k-adorartik Jéeobaeʼ k-yaabiltmaj u Tʼaan, le Bibliaoʼ. K-ojel jach jaaj le baʼaxoʼob tsʼíibtaʼanoʼoboʼ, ku taasik tsolnuʼukoʼob jach jeʼel u yáantkoʼon ichil k-kuxtaleʼ yéetel ku yeʼesik le yaabilaj ku yuʼubik Jéeoba yoʼolal le familiaʼoboʼ (Salmo 119:105; Lucas 1:3; 1 Juan 4:19). Toʼoneʼ k-kʼáat xan k-áant u maasil utiaʼal ka u kanoʼob le jatsʼuts baʼaloʼob yaan teʼ Bibliaoʼ. Le oʼolal yéetel kiʼimak óolal k-aʼalikteʼexeʼ t-jóoʼsaj le túumben libroaʼ: Jatsʼuts baʼaloʼob kin kanik teʼ Bibliaoʼ. K-kʼáat tsolteʼex jujunpʼéel baʼaxoʼob tiʼ bix beetaʼanil le libroaʼ.

Le libroaʼ beetaʼab utiaʼal le mejen paalaloʼoboʼ. Chéen baʼaleʼ jeʼel xan u yáantik le nukuch máakoʼob u kʼáatoʼob maas kaanbal tiʼ le Bibliaoʼ. Tsʼoʼoleʼ le Bibliaoʼ junpʼéel libro utiaʼal ka xoʼokok tumen tuláakal máakoʼob, le oʼolaleʼ tuláakloʼon jach jeʼel k-jóoʼsik u yutsil k-xakʼaltik le baʼaxoʼob ku kaʼansikoʼ, tumen jeʼel u yáantkoʼon utiaʼal ka kiʼimakchajak k-óoleʼ.

Jeʼex tsʼíibtaʼanil teʼ Bibliaoʼ, le libroaʼ ku tsikbaltik bix káajik u yantal le familiaoʼ. Le tsikbaloʼoboʼ ilaʼab u tsʼíibtaʼal utiaʼal ka séeb naʼataʼak yéetel tak tuʼux páajchajeʼ bin u tsoʼolol jeʼex yanil teʼ Bibliaoʼ.

Chéen baʼaleʼ le libroaʼ maʼ chéen ku tsikbaltik le baʼaxoʼob yaan teʼ Bibliaoʼ. Le tʼaanoʼob meyajnajoʼ bey xan le fotoʼoboʼ ku beetik u yilaʼal bey jach táan u yúuchul le baʼaxoʼob ku tsikbaltaʼaloʼ yéetel ku chíikbesik bix tu yuʼubiluba le máaxoʼob táakpajoʼob teʼ tsikbaloʼ.

Le libroaʼ ku yáantkoʼon k-ileʼ le Bibliaoʼ junpʼéel libro ku tʼaan tiʼ máaxoʼob tu yuʼuboʼob u tʼaan Jéeoba yéetel tiʼ máaxoʼob maʼ tu yuʼuboʼob u tʼaaniʼ. Ku yáantkoʼon xan kaanbal tiʼ le baʼaxoʼob tu beetaj le máaxoʼob ku chʼaʼchiʼitaʼaloʼoboʼ (Romailoʼob 15:4; 1 Corintoiloʼob 10:6). Le libroaʼ 14 jaatsoʼob ku taasik. Tu káajbal cada jaatseʼ ku jáan aʼalaʼal jujunpʼéel baʼaxoʼob jeʼel u páajtal k-kanikeʼ.

 Wa yaan a paalaloʼobeʼ, jeʼel u páajtal a múul xokik tu yéeteloʼob junpʼéel tiʼ le xookoʼoboʼ, yéetel a múul tsolkeʼex baʼax ku kaʼansik le fotoʼob ku taaskoʼ. Tsʼoʼoleʼ jeʼel u páajtal a xokikeʼex le tekstoʼob tuʼux chʼaʼabaʼan le xookoʼ. Áant a hijo u naʼat baʼax yaan yil le baʼax ku xokik teʼ Bibliaoʼ yéetel le baʼaxoʼob ku kaʼansik cada xookil tiʼ le librooʼ. Lelaʼ letiʼe baʼax xan jeʼel u páajtal u beetaʼal utiaʼal u yáantaʼal juntúul nojoch máak u naʼat le baʼax ku kaʼansik le Bibliaoʼ.

Le libroaʼ k-kʼáat ka u yáant le máaxoʼob uts u puksiʼikʼaloʼoboʼ, le táankelmoʼob yéetel le nukuch máakoʼoboʼ, utiaʼal ka kaanbalnakoʼob tiʼ u Tʼaan Dios yéetel ka u tsʼáaʼob ichil u kuxtaloʼob. Beyoʼ jeʼel xan u páajtal u adorartikoʼob Jéeobaeʼ yéetel u yantaloʼob ichil u jatsʼuts familia.