Nùɖíɖó e nukún nɔ mɔ lɛ é jí wɛ Biblu bɛ́ xó sín; é bló bɔ mǐ mɔ nukúnnú jɛ nǔ ɖagbeɖagbe ɖěɖee Jehovah bló ɖò jixwé kpo ayikúngban jí kpo lɛ é wu. Nú mɛjitɔ́ ɖé wɛ nú we hǔn, d’alɔ vǐ towe bonu é ni mɔ nukúnnú jɛ nùɖíɖó jiwǔ vovo lɛ wu. Xlɛ́ lee Mawu dá gbɛtɔ́ lɛ bɔ ye hugǎn kanlin lɛ tawun gbɔn nǔwukpikpé elɔ lɛ nina ye gblamɛ gbɔn é: ye nɔ ɖɔ xó, nɔ lin tamɛ, nɔ bló nǔ vovo lɛ, nɔ jihan bo nɔ xoɖɛ. D’alɔ vǐ towe bonu hlɔnhlɔn Jehovah tɔn, nùnywɛ tɔn, ɖò taji ɔ, wanyiyi e é ɖó nú nùɖíɖó tɔn lɛ bǐ kaka jɛ mǐ mɛ ɖokpo ɖokpo jí é ni sù nukún tɔn mɛ.