Mbivilia yambĩĩe kwa kũelesya ngewa ya wũmbi. Nĩtũeleetye syĩndũ mbanake ila Yeova woombie vaa ĩũlũ wa nthĩ na ĩtunĩ. Ethĩwa wĩ mũsyai, tetheesya syana syaku syone maũndũ ma kũsengyʼa ala monekaa nthĩnĩ wa wũmbi. Iwetee ũndũ Ngai wũmbĩte andũ me kĩvathũkanyʼo mũno na nyamũ. Elesya ũtonyi wa mwanya ũla twĩthĩawa nawʼo wa kũneena, kũsũanĩa, kũseũvya syĩndũ itaaoneka, kwina, na kũvoya. Tetheesya mwana waku one ũndũ Yeova wĩ vinya na ũĩ wingĩvĩte. O na nĩwaĩle kũmũtetheesya mũno mũno one ũndũ Yeova wendete kĩla ũmwe witũ vamwe na syĩndũ ila wũmbĩte.