Muma chakore gi weche ma lero kaka Jehova nochueyo gik mabeyo duto ma wang’ nyalo neno e kor polo kod e piny. Ka in janyuol, kony nyathini mondo one gik mopogore opogore ma Jehova ochueyo. Lerne kaka Nyasaye nochueyo dhano e yo makende ahinya moloyo le. Nomiyo dhano nyalo mar wuoyo, paro, loso gik manyien, wer, gi lemo. Konye bende mondo ong’e kaka Jehova tiyo maber gi tekone, kaka oriek, kod kaka ohero chuechne duto moriwo ng’ato ka ng’ato kuomwa.