Petameko Ombiimbeli oya popya kombinga yeshito. Otayi tu lombwele iinima iiwanawa mbyoka Jehova a shitila megulu nosho wo kombanda yevi. Ngele owu li omuvali, kwathela omumwoye a mone iinima iiwanawa yi ili noyi ili mbyoka yi li meshito. Mu kwathela a mone kutya Kalunga okwa shita aantu ye na oondunge ye vule kokule iinamwenyo. Aantu okwe ya shita haya popi, haya dhiladhila muule, haya nduluka po iinima, hayi imbi nohaya galikana. Kwathela omumwoye a pandule Jehova omolwoonkondo nuunongo we, noku pandule wo unene ohole ye ndjoka hu ulukile iishitwa ye ayihe, moka natse twa kwatelwa mo.