Tepin koasoi kan nan Paipel kin koasoia duwen soahng kan ar kepikipikda, oh e kin kahrehiong kitail en kilang soahng kaselel kan me Siohwa ketin wiahda pahnlahng oh nin sampah. Ma kowe pahpa de nohno men, sewese noumw seri en kilang kepikipik kaselel tohto me wekpeseng. Kasalehda ia duwen Koht eh ketin kapikada aramas akan en uhdahn weksang mahn akan ni eh ketikihong kitail koahiek en koasoi, madamadau, wiahda soahng kan, koul, oh kapakap. Kakairada eh kalahnganki sapwellimen Siohwa kehl oh erpit, oh keieu eh ketin poakohng sapwellime kepikipik koaros, iangahki emenemen kitail.