Kabwarabwaraani Mwakoro 2
E aera ngke e karokoa te ieka Iehova bwa e na kamaunaia kaain te aonnaba n te tai arei? Tabeua te tai imwini karikaia aomata, e a moana te karitei Tatan nakon Iehova. Tabeman a tei n ana itera Tatan n aron Atam, Ewa, ao natiia ae Kain. Ma tabeman riki n aron Abera ao Noa, a tei n ana itera Iehova. A rikirake ni buakaka angia aomata n te aro are e a karokoa kamaunaan te waaki ae buakaka Iehova n te tai arei. Ti na buokaki n te mwakoro aei n ataia ae Iehova e nora te itera ae ti tei iai, ao e na bon aki kariaia te buakaka bwa e na tokanikai i aon te raoiroi.
N TE MWAKORO AEI
REIREI 3
A Aki Ongeaba Atam ma Ewa Iroun te Atua
Tera te bwai ae okoro n te kai teuana n te onnaroka are i Eten? E aera ngke e kana uaana Ewa?
REIREI 4
E Kairiri te Un Nakon te Tiritiri
E butimwaea ana karea Abera te Atua ao e aki butimwaea ana karea Kain. Ngke e a ataia Kain, e rangi n un iai ao e karaoa te bwai ae rangi ni buakaka.
REIREI 5
Ana Aake Noa
Ngke a ruo anera ni karekeia buuia i aon te aba, a karikiia natiia mwaane aika aintoa ma n iowawa. E a butanako te iowawa. Ma e kaokoro Noa—e tangira te Atua ao e ongeaba irouna.
REIREI 6
A Kamaiuaki Waniman ao A Rin n te Aonnaba ae Boou
N tain te Ieka ao e bwaka te karau 40 te ngaina ao 40 te bong. Teuana tabun aia ririki Noa ma ana utu i nanon te aake, ni karokoa are a tuangaki iroun te Atua bwa a a kona n otinako.