Introduksion ed Seksion 2
Akin ya dinelap nen Jehova so interon dalin nensaman? Nen dagdaiset ni totoo ed mundo, walay ginmapon panlalaban—say panlalaban na maong tan mauges. Say arum, singa si Adan, Eva, tan say anak dan si Cain, et pinmanig ed mauges. Balet say arum, singa si Abel tan Noe, et pinmanig ed maong. Dakdakel so nagmaliw ya mauges kanian dineral nen Jehova iray mauges a totoo. Naaralan tayod sayan seksion ya nanenengneng nen Jehova no siopay papanigan tayo tan agton balot paulyan ya taloen na mauges so maong.
DIAD SAYAN SEKSION
LEKSION 3
Ag-inunor nen Adan tan Eva so Dios
Akin et nikaduma imay sakey ya kiew ed garden na Eden? Akin ya angan si Eva na bunga na satan a kiew?
LEKSION 4
Amatey Lapud Pasnok To
Inawat na Dios so apay nen Abel balet agto inawat so apay nen Cain. Nen naamtaan nen Cain, nampasnok ya maong tan nanggaway mauges.
LEKSION 5
Say Biong nen Noe
Nen wala ray mauges ya anghel ya angasawa na bibii diad dalin, awalaan ira na ananak ya angkakabaleg, tan sasakitan da ray totoo. Dakdakel so totoon manggagaway mauges. Balet duma si Noe—inaro toy Dios tan inunor to.
LEKSION 6
Waloran Totoo so Akaligtas ed Delap
Inmuran na 40 ya agew tan 40 ya labi kanian dinmelap. Masulok ya sakey taon ya walad loob na biong si Noe tan say pamilya to. Kayari to, pinmaway la ra.
