Malito nyo tule nya gipandre 2
Khu ginani Jehovha a fuvisidego litigo dziteponi dza gale khu gu thumisa talo nya mati? Neti ma nga pheya matimo nya vathu, gu di pheya nyimbi nya esi nya sadi ni esi nyo vivbe. Vathu nyo khaguri, nya nga Adhamu, Evha, ni gyanana gyawe Kayimi, va di hatha gu gira silo nyo vivbe. Vathu nyo khaguri nya nga Abheli ni Nowa va di hatha gu gira silo nya sadi. Ganiolu, vathu nya vangi va di pheya gu manega ni mavbanyelo nyo vivbe ngudzu nyo bwe Jehovha a vbweta gu fuvisa litigo lolo. Omu nya gipandre gegi, hi na wona gu khethu Jehovha a ngu si wona gu khuye ha gu hatha gu ema ni mani nigu uye kha na nga dzumeleya gu khuye guvivba gu pala silo nya sadi.
AVBA NYA GIPANDRE GEGI
GIHEVBULO 3
Adhamu ni Evha kha va engisa Nungungulu
Gilo muni nya lisima gi nga ba gi romo thembweni ga Edheni? Khu ginani Evha a nga hodza handro wule?
GIHEVBULO 4
A di zangari a hegisa khu gu songa muthu
Nungungulu a hakha muphaso wa Abheli ganiolu asi hakhi wa Kayimi. Tepo si nga girega isoso Kayimi, a di zangari ngudzu a gira gilo nyo thise.
GIHEVBULO 5
Litaru la Nowa
Tepo dzingilozi dzi nga ta dzegana ni vanyamayi mafuni sanana sakona si di dandra si manega ni tshivba. Wuvivbi wu di manega tigoni gwatshavbo. Nowa a di gu hambabide ni vambe — a di gu engisa ni gu haladza Nungungulu.
GIHEVBULO 6
8 vathu va nga vbuluga gu songwa khu talo nya mati
Dzixeya nya 40 matshigu, wutshigu ni mihani. Nowa ni ndranga yaye va khade umo nya litaru mwaga moyo ni guvbindra. Nungungulu a di va embeya gu va duga khumo nya litaro.
