Skʼeʼulabʼil ja bʼa xetʼan 2
¿Jas yuj ja Dyos xchʼaya snajel sok jun bʼutʼ jaʼ ja ixuk winik ja bʼa najate? Man kʼulaji ja ixuk winiki, kʼe jun wokol: ja tiroʼanel ja bʼa lek soka bʼa mi lekuk. Jujuntik, jastal ja Adán, ja Eva soka skereme Caín, stsaʼawe skʼulajel ja bʼa mi lekuk. Pe jel tʼusan ja maʼ skʼulan ja bʼa leki, tey ja Abel soka Noé. Jitsan ixuk winik jelni malo wajye. Jaxa Jyoba tʼilani xchʼaya snajel. Ja bʼa xetʼan it oj jnebʼtik ja Jyoba wa xyila bʼaya wa stsaʼatik skʼulajeli. Sok mini oj yakan ja bʼa jastik leki akʼulajuk ganar yuja bʼa mi lekuki.
JA BʼA XETʼAN IT
SJEJEL 3
Ja Adán soka Eva skʼokowe ja yabʼal Dyos
¿Jasa stukil yiʼoj kechanta jun teʼ ja bʼa kʼachinubʼ bʼa Edén? ¿Jas yuj ja Eva sloʼo ja sat teʼi?
SJEJEL 4
Yuja tajki smila ja smoj-alijel
Ja Dyos skʼulan gusto ja majtanal yaʼa ja Abel, pe miyuk ja bʼa Caín. Yajni ja Caín snaʼa, jel tajki sok wego skʼulan jun jasunuk mi lekuk.
SJEJEL 5
Ja arka bʼa Noé
Ja anjelik kʼoka abʼal nupaniye soka ixuke sok ajyi yuntikile bʼa jel malo sok jel chaʼanik. Bʼutʼ bʼa mi lekuk ja luʼumi. Pe ja Noé syajtay sok skʼuʼan ja Dyos.
SJEJEL 6
Waxake ixuk winik bʼa jun ajkʼach luʼum
Ja bʼa Bʼutʼ Jaʼ, yaʼa jaʼ 40 kʼakʼu sok 40 akwal. Ja Noé soka spamilya ajyiye mas ja jun jabʼil ja bʼa arka. Tixa aljiyabʼye yuja Dyos bʼa ojxa bʼobʼ eluke.
