Majubul ma pes 3
Mu nwii mi bi noñ Ntida malép, Bibel i nsima môl ma ndék bôt i i bi gwélél Yéhôva. Wada wap a bé le Abraham, nu a bi yiba kiki liwanda li Djob. Inyuki ba bé séblak nye liwanda li Djob? Ibale u yé ngwal, hôla man woñ i tehe le Yéhôva a ntôñ nye, a gwé ki ngôñ i hôla nye. Kiki Abraham ni bagwélél ba Djob bape, kiki Lôt bo Yakôb, di gwé kunde i bat Yéhôva mahôla. Di nla ba nkwook nkaa le Yéhôva a ga yônôs mimbônga nwé nwominsôna.
MUNU PES INI
Nkum ndap u Babel
Ngim bôt i bi yoñ makidik i oñ nkoñ, ni nkum ndap u u bé bol i ngii. Inyuki Djob a bi boñ le ba bôdôl pot ngandak dilémb kunda yada?
Abraham bo Sara ba bi nôgôl Djob
Inyuki Abraham bo Sara ba bi yék mbai yap i tison i Ur inyu niñ i mandap ma mabadô i loñ Kanaan?
Sôk i nsôk, ba ngwal man munlôm!
Lelaa Djob a ga yônôs mbônga a bôn Abraham? U nyônôl ngii numbe man Abraham—Isak tole Ismaél?
Bigdana nwaa Lôt
Djob a bi nôs nop hié ni solfa ngii Sôdôm ni Gômôra. Inyuki Djob a bi tjé bitison bi? Inyuki di nlama hoñol nwaa Lôt?
Manoodana ma hémle
Djob a kal Abraham le: ‘Soho, yoñ mpom woñ man munlôm le Isak, u ti nye kiki sesema i hikôa hi loñ Môria.’ Hémle i Abraham i bé lama noodana, kii a ga boñ?
Yakôb a bi kôs ngababum
Isak bo Rébéka ba bi gwal bon bôlôm iba, mahas. Ba ti bo môl le Ésau ni Yakôb. Kiki Ésau nyen a bé man nu mañ, a bé lama bana ngababum i tôbôtôbô. Ndi, inyuki a bi nuñul yo inyu pan i mpele?
Yakôb bo Ésau ba nkôp nsañ
Lelaa Yakôb a bi boñ inyu kôhna bisai bi añgel? Lelaa a bi kôp nsañ ni Ésau?
