Saashin tü Wiwüliakat, palitchon na wayuu aʼyataakana nümüin Jeʼwaa süchikijee tü juya miyoʼushaatakat. Maʼaka naaʼin Abraham, chi «naʼaleewain Jeʼwaa» münakai. Wekirajaajeerü anain jamüin «naʼaleewain Jeʼwaa» nümünaka. Kachonle pia, pükaaliinja naya süpüla natüjaain saaʼu jülüjain naya naaʼin Maleiwa waneʼewai nakua otta nükaaliinjeein naya. Eesü süpüla wachuntuin kaaliinwaa nümüin Jeʼwaa maʼaka naainjain shia Abraham, Lot nümaa Jacob otta wanoujeerü anain nikeraajeerüin Jeʼwaa süpüshuaʼa tü pütchi nüpansaajakat wamüin.