Biji mu Kipungu 3
Baibolo watongolatu bantu bacheche baingijilanga Yehoba Muyulo byo apwile. Pa bano bantu paji ne Abalahama, wayukanyikilwe’mba mulunda wa kwa Yehoba. Ki ka kyalengejile Abalahama kwikala Mulunda wa kwa Yehoba? Inge mwi bansemi kwashai mwanenu ayuke’mba Yehoba wamutemwa bingi kabiji winengezha kwitukwasha. Twafwainwa kukasuluka kulomba Yehoba kumukwasha byonka byaubanga Abalahama ne banabalume bakwabo ba kishinka, nabiji Lota ne Yakoba. Twafwainwa kushiinwa kuba’mba Yehoba ufikizha byonse byo alaya.
BIJI MU KINO KIPUNGU
Kyamba kya Babela
Bantu bafuukwilepo kushimika muzhi ne kyamba kyalepa. Mambo ka Lesa o avulañenye mulaka ye baambilenga?
Abalahama ne Sala Bakookejile Lesa
Mambo ka Abalahama ne Sala o bashijile nzubo yabo mu muzhi bwa Ula ne kuya ne kwikala bakañenda mu Kenana?
Basemene Mwana Wamulume
Lesa wafikizhe byepi mulaye wanji kwi Abalahama? Ñanyi mwana wa kwa Abalahama mwafwainwe kufikila buno bungauzhi—mwi Izaka nyi, inyi mwi Ishimela?
Vulukai Muka Lota
Lesa wanokeshe mabwe ateema mujilo ne mujilo pa muzhi wa Sodoma ne Gomola. Mambo ka ino mizhi kyo beyonawijile? Mambo ka o twafwainwa kuvulukilanga muka Lota?
Lwitabilo lwa kwa Abalahama Lwaesekelwe
Lesa wabuujile Abalahama amba: ‘Yanga na mwanobe yenka ye uji nanji ukamutapishe ku mutumba uji mu kyalo kya Moliya.’ Abalahama waubile byepi pa byo bamubuujile byaesekele lwitabilo lwanji?
Yakoba Bamupesheshee
Izaka ne Libeka bajinga na mapasa babalume, Isao ne Yakoba. Isao ye wajinga mutanshi kusemwa kabiji ye wafwainwe kutambula kya buswanyi kyanema bingi. Pano mambo ka o apoteshe bubeji?
Yakoba ne Isao Batendekele Kumvwañana Jibiji
Yakoba waubile byepi pa kuba’mba malaika amupeshe? Kabiji waubile byepi pa kuba’mba atendeke kumvwañana jikwabo ne Isao?
