Biji mu Kipungu 4
Kino kipungu kyaamba pa mwapichile bwikalo bwa kwa Yosefwa, Yoba, Mosesa ne bena Isalela. Abano bonse bachinchikile bya malwa byavula byafuminenga kwi Satana. Bamo bebobilenga nshiji, kwibakasa mu kaleya, kwibakwata buzha ne kwibepaya. Bino, Yehoba wibazhikijilanga. Inge mwi bansemi kwashai mwanenu ayuke kyalengejile bano bantu kutwajijila kwikala na lwitabilo nangwa kya kuba bapichilenga mu bya malwa.
Binkunka jikumi Yehoba byo aletele byasolwele patoka kuba’mba kafwako lesa wa bena Ijipita wamukila bulume ne. Mulumbulwilai ayuke Yehoba byo azhikijilanga bantu banji kala ne byo ebazhikijila mu ano moba.
BIJI MU KINO KIPUNGU
Muzha Wakookelanga Lesa
Yosefwa waubile bintu byawama, pano bino wamanamine bingi. Mambo ka?
Yehoba Kechi Walubileko Yosefwa Ne
Nangwa kya kuba Yosefwa wajinga kwalepa na kisemi kyanji, bino Lesa kechi wamulubileko ne.
Yoba Wajinga Ñanyi?
Yoba wakookelanga Yehoba nangwa wapichilenga mu bya malwa.
Mosesa Wasajilepo Kupopwela Yehoba
Mosesa bamuzhikijile byo ajinga lukeke, na mambo a byaubile bainanji.
Kipupu Kyatemenenga Mujilo
Mambo ka kipupu kyatemenenga mujilo o kyabujile kupya?
Binkunka Bitanshi Bisatu
Na mambo a bwitoote Felo wakaine kumvwina kyapelatu kyo bamubujile ne kuletela bya malwa bantu banji.
Binkunka Bitanu na Kimo Byalondejilepo
Abino binkunka byapusene byepi na binkunka bitanshi bisatu?
Kinkunka kya Bujikumi
Kino kinkunka kyamupezhezhe maana, kabiji kyalengejile Felo kuswisha bena Isalela kuya.
Kya Kukumya Kyamwekele pa Kalunga Kachila
Felo wapichile mu binkunka jikumi, nanchi wapulukile ku bino byakukumya byaubile Lesa nyi?