Konima yoomwedhi mbali, sho Aaisraeli ya taaguluka Efuta Etiligane, oya yi kOndundu Sinai. Hoka, Jehova okwa li a ningi ehangano nayo, ya kale oshigwana she shi ikalekelwa. Okwe ya gamene nokwe ya pe kehe shimwe ya li ya pumbwa ngaashi omanna, oonguwo ndhoka ihaadhi kulupa nosho wo ehala lyokukala lya gamenwa. Ngele ngoye omuvali, kwathela omumwoye u uve ko kutya omolwashike Jehova a li a pe Aaisraeli Ompango, etsalihangano nosho wo aayambi. Tsa omuthindo nkene sha simana okudhiginina shoka wu uvaneka, okukala omwiifupipiki nokukala aluhe omudhiginini kuJehova.