Etwalemo lOshitukulwa 6
Eshi Ovaisrael va fika mEdu lEudaneko, etwali ola li la ninga ondingandinga yelongelokalunga lashili. Ovapristeri ova li hava hongo Omhango, novatokolipangeli ova li hava wilike oshiwana. Oshitukulwa eshi osha yelifa shi na sha nanghee omatokolo neenghatu domunhu tadi dulu okukuma vamwe neenghono. Omuisrael keshe okwa li e na oshinakuwanifwa kuJehova nosho yo kovanhu vakwao. Divilika nghee enwefemo laDebora, Naomi, Josua, Hanna, okamonakadona kaJefta nosho yo Samuel la li la kuma vamwe. Popya kutya nokuli novanhu vamwe ovo vehe fi Ovaisrael, ngaashi Rahab, Rut, Jael nOvagibeon, ova li va tokola okwaama kombinga yOvaisrael molwaashi ova li ve shii kutya Kalunga oku li pamwe navo.
MOSHITUKULWA ESHI
Jehova ta hoolola Josua
Kalunga okwa li a pa Josua omalombwelo oo taa dulu yo oku tu kwafela kunena.
Rahab ta holeke eendadi
Omakuma aJeriko okwa teka po. Ashike eumbo laRahab inali ninga sha, nonande ola li la tungwa la kwatafana nekuma.
Josua nOvagibeon
Josua ta ilikana kuKalunga ta ti: ‘Etango kanghama’ Mbela Kalunga okwa nyamukula ngoo?
Omuwiliki mupe novakainhu vavali omapenda
Konima eshi Josua a fya, Ovaisrael ova li va tameka okulongela oikalunga. Onghalamwenyo oya li ya naipala neenghono, ova li va mona ekwafo okupitila momutokolipangeli Barak, omuprofeti omukainhu Debora naJael nombosha yotenda.
Rut naNaomi
Ovakainhu vavali ovo va filwa ovashamane vavo, ova alukila kuIsrael. Umwe womovakainhu ovo, Rut, okwa li a ya a ka longe mepya, omo kwa li a didilikwa kuBoas.
Gideon ta findi Ovamidian
Konima eshi Ovamidian va djuupaleka onghalamwenyo yOvaisrael, ovanhu ova li va pula Jehova ekwafo. Ongahelipi etangakwaita laGideon linini la dula okufinda ovakwaita 135 000 ovatondi vavo?
Hanna ta ilikana a mone okaana okamati
Elkana okwa li va ya naHanna, Peninna nounona ketwali kuSilo va ka ilikane. Fimbo va li oko, Hanna okwa li a ilikana a mone okaana okamati. Eshi pa pita odula, Samuel okwa li a dalwa.
Jefta ta ningile Jehova eudaneko
Jefta okwa li a ninga eudaneko lilipi, nomolwashike? Okamonakadona kaJefta oka li ke linyenga ngahelipi keudaneko laxe?
Jehova ta popi naSamuel
Ovanamati vavali vomupristeri omukulunhu Eli ova li hava longo ve li ovapristeri ketwali, ashike kava li hava dulika keemhango daKalunga. Omunyasha Samuel ka li e va fa, na Jehova okwa li a popya naye.
Jehova okwa li a pameka Simson
Kalunga okwa li a pameka Simson opo a lwife Ovafilisti, ashike eshi Simson a ninga etokolo la puka, Ovafilisti ove mu kwata po.
