Biji mu Kipungu 6
Bena Isalela byo bafikile mu Ntanda ya Mulaye bapopwelanga Lesa pa tente wa lusambakeno. Bañanga bafunjishanga Mizhilo ya Lesa, kabiji bamitonyi bo balamanga bantu. Kino kipungu kyalumbulula byo tufuukula ne byubilo byetu byo byakonsha kukwasha bakwetu. Mwina Isalela yense bamukambizhe kukookela Lesa ne kwikala bulongo na bakwabo. Lumbululai byubilo bya kwa Debola, Naomi, Yoshua, Hana, mwana wamukazhi wa kwa Yefita ne Samwela byo byakwashishe bantu. Lumbululai ne kuba’mba bantu babujile bena Isalela, nabiji Lehaba, Luta, Yaela ne bena Gibeona bafukwilepo kukwatankana na bena Isalela mambo bayukile’mba Lesa wajinga nabo.
BIJI MU KINO KIPUNGU
Yehoba Wasajile Yoshua
Bintu Lesa byo akambizhe Yoshua ne atweba byakonsha kwitukwasha mu ano moba inge twibilondela.
Lehaba Wafile Bamwendela Ntanda
Nsakwa ya muzhi wa Yeliko yonse yakundukile. Bino nzubo ya kwa Lehaba yashajile nangwa kya kuba yajinga peulu ya nsakwa.
Yoshua ne Bena Gibeona
Yoshua walomba kwi Lesa amba: “Obewa juba, imanatu!” Nanchi Lesa wakumbwile nyi?
Ntangi Wakatataka ne Banabakazhi Babiji Bachinchikile Bingi
Yoshua byo afwile, bena Isalela betendekele kupopwela bankishi. Bwikalo bwatamine bingi. Bino Lesa wibakwashishe kwingijisha Mutonyi Balaka, ngauzhi wa mukazhi aye Debola, kabiji ne mwanamukazhi aye Yaela waipaile mulwanyi na lupopo wa tente.
Luta ne Naomi
Bano banabakazhi bafwilwa babwelele ku Isalela. Umo wajinga Luta, wapupulanga kajo mu bujimi mwamuyukijile Boaza
Gidiona Washinjile Bena Mijanyi
Bantu balombele Yehoba kwibakwasha mambo bena Mijanyi bebekezhe bufinda. Ki ka kyalengejile nzhita ya kwa Gidiona yajingatu icheche kushinda nzhita ya balwanyi yajinga na bashilikale 135,000?
Hana Walombele Mwana Wamulume
Elekana waya ku tente wa lusambakeno ku Shilo pane ne Hana, ne Penina ne baana banji. Hana koko alombele Lesa kumupa mwana. Samwela wasemenwe, byo papichiletu mwaka umo.
Mulaye wa kwa Yefita
Ñanyi mulaye walayile Yefita kabiji mambo ka? Mwana wa mukazhi wa kwa Yefita waubile byepi pa byalayile bashanji?
Yehoba Waambile ne Samwela
Baana babiji ba Ñanga Mukatampe Eli baingijilenga mwingilo wa buñanga pa tente wa lusambakeno. Kechi bakokelanga mizhilo ya Lesa ne. Bino Samwela nangwa wajinga mwanyike wapuseneko nabo.
Yehoba Wapele Samisonyi Bulume
Lesa wapele Samisonyi bulume ne kulwa na bena Filishitiya, bino Samisonyi byo abuujile kufuukulapo bulongo, bena Filishitiya bamukwachile.
