Mi hñäni yä israelita näꞌä rä Hogä Hai xki prometebi Jeoba, nuꞌu̱ bi usa rä tabernáculo pa ja bi xo̱kämbenini Jeoba. Yä majhä go mi udi de rä Ley ꞌne nuꞌu̱ yä nzaya go mi gu̱hni rä hnini. Nunä sección udi ge nuꞌu̱ yä tꞌo̱tꞌe di pe̱fihu̱, dä za dä matsꞌi ꞌne dä nupäbi yä mfeni märꞌaa. Kada nꞌa rä israelita mi pe̱ꞌtsi nꞌa rä responsabilida ante Jeoba ꞌne rä mikꞌei. ꞌÑuti ri bätsi te mä ejemplo bi zoogi Débora, Noemí, Josué, Ana, rä tꞌixu Jefté ꞌne Samuel. ꞌNehe, fatsꞌi pa dä hyandi hanja Rahab, Rut, Jael ꞌne yä gabaonita, bi huahni dä mꞌu̱i de rä lado yä israelita ngeꞌä nuꞌu̱ mi pädi xä ñho ge Jeoba mi ꞌmu̱i kongeꞌu̱.