Mazgu Ghakwamba gha Chigaŵa 6
Ŵaisrayeli ŵakati ŵafika mu Charu cha Layizgano, ŵakasopanga Chiuta pa chihema. Ŵasembe ŵakasambizganga Dango, ndipo ŵeruzgi ŵakalongozganga ŵanthu. Chigaŵa ichi chikulongora umo ŵanji ŵakukhwaskikira chifukwa cha ivyo munthu wasankha na kuchita. Muisrayeli waliyose wakaŵa na udindo pamaso pa Yehova kweniso ku ŵanthu ŵanyake. Longosorani umo ŵanthu ŵakakhwaskikira na ŵanthu aŵa: Debora, Naomi, Joshuwa, Hana, mwana wa Yefita, na Samuyeli. Yowoyani kuti ŵanthu ŵanyake awo ŵakaŵa Ŵaisrayeli yayi, nga ni Rahabi, Rute, Yayeli, na Ŵagibiyoni ŵakakolerana na Ŵaisrayeli chifukwa chakuti ŵakamanya kuti Chiuta wakaŵa nawo.
MU CHIGAŴA ICHI
Yehova Wakasankha Joshuwa
Chiuta wakapeleka malango kwa Joshuwa agho ghakutovwiraso nanga ni sono.
Rahabi Wakabisa Mphachi
Viliŵa vya Yeriko vikawa. Kweni nyumba ya Rahabi yikawa yayi, nangauli yikaŵa musi mwa m’panda.
Joshuwa na Ŵagibiyoni
Joshuwa wakalomba Chiuta ‘kuti dazi lileke kunjira.’ Kasi Chiuta wakamuzgora?
Mulongozgi Muphya na Ŵanakazi Ŵaŵiri Ŵachikanga
Joshuwa wakati wafwa, Ŵaisrayeli ŵakamba kusopa vikozgo. Ŵanthu ŵakasuzgika, kweni ŵakasanga wovwiri kwizira mwa Mweruzgi Baraki, ntchimi Debora, na Yayeli!
Rute na Naomi
Ŵanakazi ŵaŵiri awo ŵafumu ŵawo ŵakafwa ŵakawelera ku Israyeli. Yumoza mwa ŵanakazi aŵa zina lake Rute, wakaluta kukavulura mu minda ya ŵanthu, uko Bowazi wakamuwona.
Gidiyoni Wakathereska Ŵamidiyani
Ŵamidiyani ŵakati ŵaŵasuzga chomene, Ŵaisrayeli ŵakapempha Yehova kuti waŵawovwire. Kasi vikenda wuli kuti ŵasilikari ŵachoko waka ŵa Gidiyoni ŵathereske ŵalwani 135,000?
Hana Wakapempha Mwana
Elikana wakatora Hana, Penina, na ŵana kuya kukasopa pa chihema ku Shilo. Kwenekura, Hana wakalomba Chiuta kuti wamupe mwana. Pakati pajumpha chaka, wakababa Samuyeli!
Ivyo Yefita Wakalayizga
Kasi Yefita wakalayizga vichi, ndipo chifukwa wuli? Kasi mwana wa Yefita wakachita wuli na ivyo awiske ŵakalayizga?
Yehova Wakayowoya na Samuyeli
Wasembe Mukuru Eli wakaŵa na ŵana ŵaŵiri awo ŵakaŵa ŵasembe pa chihema, kweni ŵakalondezganga yayi malango gha Chiuta. Munyamata Samuyeli wakachitanga nthena yayi ndipo Yehova wakayowoya nayo.
Yehova Wakamupa Nkhongono Samusoni
Chiuta wakamupa nkhongono Samusoni kuti watimbane na Ŵafilisiti, kweni Samusoni wakati wachita vinthu mwambura mahara, Ŵafilisiti ŵakamukora.
