Saji ni yɔɔ fã nɛɛ mli lɛ he aaafee afii 80, ni amɛtee nɔ yɛ Maŋtsɛ Saul kɛ Maŋtsɛ David beiaŋ. No mli lɛ, Saul baa ehe shi ni esheɔ Nyɔŋmɔ gbeyei. Shi etsɛɛɛ ni etsake. Ekɛ Yehowa gbɛtsɔɔmɔi tsuuu nii dɔŋŋ. No hewɔ lɛ, Yehowa kpoo lɛ, ni sɛɛ mli lɛ, ehã Samuel fɔ David mu akɛ mɔ ni baaye Saul sɛɛ akɛ Israel maŋtsɛ. Saul ye David he awuŋa ni eka shii abɔ akɛ ebaagbe lɛ, shi David efeee lɛ nɔ ko kɛtseee. Saul binuu Yonatan le akɛ Yehowa ni hala David, no hewɔ lɛ, eye David anɔkwa. David fee eshai ni yɔɔ hiɛdɔɔ, shi be ni Yehowa tsɔse lɛ lɛ, ekpɛlɛ nɔ. Kɛ́ fɔlɔ ji bo lɛ, ye obua obi lɛ ni ena akɛ, ehe miihia ni wɔkɛ Nyɔŋmɔ gbɛjianɔtoi atsu nii be fɛɛ be.