Maelesyo ma Kĩlungu kya 7
Kĩlungu kĩĩ kĩeleetye ngewa ya Mũsumbĩ Saulo na ya Mũsumbĩ Ndaviti ya ĩvinda ya myaka ta 80. Mbeenĩ Saulo aĩ na wĩnyivyo na nĩwamwĩwʼaa Ngai, ĩndĩ ĩtina wa ĩvinda ĩkuvĩ nĩwavĩndũkie na aeka kũatĩĩa maũndũ ala Yeova wamwĩaĩaa. Yeova nĩwamũleile Saulo na ĩtina wa ĩvinda amwĩaĩa Samueli amwĩtĩkĩsye Ndaviti mauta atwʼĩke mũsumbĩ wa Isilaeli. Saulo nĩwakwatiwe nĩ kĩwĩu na kwoou mavinda maingĩ nĩwendaa kũmũaa Ndaviti, ĩndĩ Ndaviti ndaaĩvanĩsya. Mwana wa Saulo ũla weetawa Yonathani nĩwamanyie kana Ndaviti anyuvĩtwe nĩ Yeova, na kwoou eethĩwa e mũĩkĩĩku kwa Ndaviti. O na kau ve mavinda Ndaviti weekie naĩ ngito, ndaalea ũkanyʼo wa Yeova. Ethĩwa wĩ mũsyai, tetheesya kana kaku kone vata wa kwĩthĩwa ke kewi kwa Yeova na ala ũnyuvĩte matũtongoesye.
KĨLUNGUNĨ KĨĨ
ĨSOMO YA 39
Mũsumbĩ wa Mbee wa Isilaeli
Ngai nĩwanengete Aisilaeli asili mamatongoesye, ĩndĩ vavika vandũ menda kũtongoewʼa nĩ mũsumbĩ. Samueli nĩwamwĩtĩkĩsye mauta Saulo atwʼĩka mũsumbĩ wa mbee wa Isilaeli, ĩndĩ ĩtina Yeova nĩwesie kũmũlea Saulo. Nĩkĩ wamũleile?
ĨSOMO YA 40
Ndaviti na Ngoliathu
Yeova nĩwamũnyuvie Ndaviti atwʼĩke mũsumbĩ wa Isilaeli ĩtina wa Saulo, na Ndaviti nĩwoonanisye kĩla kyatumie Yeova amũnyuva.
ĨSOMO YA 42
Yonathani Aĩ na Ũkũmbaũ na Aĩ Mũĩkĩĩku
Mwana wa mũsumbĩ nĩwatwʼĩkie mũnyanya wa Ndaviti.
