တၢ်နီၤဖး​တခါ​အံၤ ပာ်ဖျါ​ထီၣ်ဝဲ​စီၤပၤ​စီလူး​ဒီး​စီၤပၤ​ဒၤဝံး အ​တၢ်ဂ့ၢ်​တၢ်ကျိၤ​လၢ အ​နံၣ် ၈၀ ဃၣ်ဃၣ်​အတီၢ်ပူၤ​န့ၣ်​လီၤ. အဆိ​ကတၢၢ်​န့ၣ် စီၤ​စီလူး​မ့ၢ်​ပှၤလၢ​အ​ဆီၣ်လီၤ​သး ဒီး​ပျံၤ​ယွၤ​လီၤ. ဘၣ်ဆၣ် တ​ယံာ်လၢၤဘၣ်​န့ၣ် အ​တၢ်​ပာ်သူၣ်​ပာ်သး ဆီတလဲ​ဝဲ​ဒီး​တ​ဒိကနၣ် ယဟိဝၤ​ယွၤ​အ​ကလုၢ်​လၢၤဘၣ်. အဃိ ယဟိဝၤ​ယွၤ​ပာ်တ့ၢ်​ကွံာ်​အီၤ ဒီး​လၢခံ​န့ၣ် ကစၢ်​ယွၤ​မၢလီၤဝဲ စီၤ​ၡမူၤအ့လး​လၢ က​ဖှူဝဲ​စီၤ​ဒၤဝံး​ဒ်သိး အဝဲ​က​ကဲထီၣ်​စီၤပၤ လၢ​ပှၤ​အံၣ်စရ့လး​ဖိ​တဖၣ်​အဂီၢ်​လီၤ. မ့ၢ်​လၢ​စီၤ​စီလူး သူၣ်​က့ၣ်​သးကါ​တၢ်​အဃိ အဝဲ​ဃုမၤ​သံဝဲ​စီၤ​ဒၤဝံး​အါ​ဘျီ ဘၣ်ဆၣ် စီၤ​ဒၤဝံး​တ​မၤကၣ်​က့ၤ​အီၤ​ဘၣ်. စီၤ​စီလူး​အ​ဖိခွါ စီၤယိနၤသၣ် သ့ၣ်ညါ​ဝဲ​လၢ​ယဟိဝၤ​ယွၤ ဃုထၢ​ထီၣ်ဝဲ​စီၤ​ဒၤဝံး​လၢ​စီၤပၤ​အဃိ အဝဲ​တီ​ဒီး​စီၤ​ဒၤဝံး​လီၤ. လၢခံ စီၤ​ဒၤဝံး​မၤ​ဘၣ်​တၢ်ကမၣ်​ဖးဒိၣ်​တခါ ဘၣ်ဆၣ် အဝဲ​တူၢ်လိာ် ယဟိဝၤ​ယွၤ​အ​တၢ်​သိၣ်ဃီၣ်​ထီဘိ​လီၤ. န​မ့မ့ၢ်​မိၢ်ပၢ်​န့ၣ် သိၣ်လိ​န​ဖိ​ဒ်သိး​အဝဲ​က​နၢ်ပၢၢ်ထီၣ်​ဝဲ​လၢ ပ​က​ဘၣ်​ဆီၣ်ထွဲ​ကစၢ်​ယွၤ အ​တၢ်ရဲၣ်​တၢ်ကျဲၤ​ထီဘိ​လီၤ.