Kalulo ye, italusa litaba ka za bupilo bwa Mulena Saule ni Mulena Davida, mwahalaa lilimo zebato ba ze 80. Kwa makalelo, Saule naaikokobeza mi naasaba Mulimu, kono hamulaho wa nakonyana acinca mi ahana kulatelela ketelelo ya Jehova. Jehova amuhana mi hamulaho wa nako, alaela Samuele kuketa Davida kuba yena mulena yanaaka tatama wa Isilaele. Bakeñisa kuli Saule naanani muna, naabatile kubulaya Davida hañata-ñata, kono Davida naasika kutiseza bumaswe. Mwanaa Saule wamushimani, yena Jonatani, naaziba kuli Jehova naaketile Davida, kacwalo naasepahala ku yena. Davida naaezize libi zetuna zeñata kono naasika hana kalimelo ya Jehova.  Haiba mu bashemi, mutuse mwanaa mina kulemuha butokwa bwa kuyemela litukiso za Jehova kamita.