Mazgu Ghakwamba gha Chigaŵa 7
Chigaŵa ichi chikulongosora ivyo vikachitika mu vyaka pafupifupi 80, mu nyengo ya Fumu Sauli na Fumu Davide. Pakwamba, Sauli wakaŵa wakujiyuyura na wakopa Chiuta, kweni wakasintha na kuleka kupulikira ulongozgi wa Yehova. Yehova nayo wakamukana, ndipo pamanyuma wakaphalira Samuyeli kuti wakaphakazge Davide kuŵa fumu yakulondezgapo ya Israyeli. Chifukwa cha sanji, Sauli wakayezga kanandi waka kuti wakome Davide, kweni Davide wakawezgera yayi. Yonatani, mwana wa Sauli, wakamanya kuti Yehova wasankha Davide, ntheura wakaŵa wakugomezgeka kwa Davide. Davide wakachita vinthu viheni chomene, kweni wakakana yayi apo Yehova wakamulanga. Usange ndimwe mupapi, movwirani mwana winu kuwona uwemi wa kukolerana na ivyo Chiuta wanozga nyengo zose.
MU CHIGAŴA ICHI
Fumu Yakwamba ya Israyeli
Chiuta wakapeleka ŵeruzgi ku Ŵaisrayeli kuti ŵaŵalongozgenge, kweni iwo ŵakakhumbanga kuŵa na fumu. Samuyeli wakaphakazga Sauli kuŵa fumu yakwamba, kweni pamanyuma Yehova wakamukana. Chifukwa wuli?
Davide na Goliyati
Yehova wakasankha Davide kuti waŵe fumu yakulondezgapo ya Israyeli, ndipo Davide wakalongora kuti Chiuta wakachita makora kumusankha.
Davide na Sauli
Chifukwa wuli yumoza wa ŵanthu aŵa wakatinkhanga munyake, ndipo uyo wakatinkhikanga wakachita wuli?
Yonatani Wakaŵa Wachikanga na Wakugomezgeka
Mwana wa themba wakaŵa mubwezi muwemi kwa Davide.
Ivyo Davide Wakananga
Wakasuzgika chomene chifukwa cha kuchita vinthu mwambura mahara.
