Maloŵe Gandanda ga Mbali 7
Mbali ajino jikutagulila mbili ja umi wa Mwenye Sauli soni Mwenye Daudi. Komboleka kuti mbili ja ŵanduŵa jajigele yaka ciŵandika 80. Pandanda Sauli jwaliji mundu jwakulinandiya soni jwakogopa Mlungu, nambo mkupita kwandaŵi jwalakwe jwacenjile soni nganakuyaga malamusi ga Yehofa. M’yoyo Yehofa ŵamkanile, soni mkupita kwandaŵi Yehofa ŵamsalile Samuyele kuti akamsagule Daudi kuŵa mwenye jwakuyicisya jwa Ayisalayeli. Mwakuwilisyawilisya Sauli jwalinjilile kum’wulaga Daudi, nambo Daudi nganawucisyaga. Mwanace jwa Sauli jwakolanjikwa Yonatani jwayimanyi kuti Yehofa ŵamsagwile Daudi kuŵa mwenye, camti m’yoyo jwalakwe jwaliji jwakulupicika kwa Daudi. Daudi jwatesile yakulemwa yekulungwakulungwa, nambo jwajiticisyaga camuko ca Yehofa ndaŵi syosope. Naga ali nangolo, amkamucisye mwanace jwawo kulola kusosekwa kwakuya yalinganyisye Mlungu ndaŵi syosope.
MU MBALI AJI
Mwenye Jwandanda jwa Ayisalayeli
Mlungu ŵapele Ayisalayeli ŵakwelusya kuti ŵalongoleleje, nambo jemanjajo ŵaŵendile mwenye. Samuyele ŵamsagwile Sauli kuŵa mwenye jwandanda, nambo mkupita kwandaŵi Yehofa ŵamkanile Sauli. Ana ligongo cici?
Daudi ni Goliyati
Yehofa akumsagula Daudi kuŵa mwenye jwakuyicisya jwa Ayisalayeli soni ŵalosisye kuti jwaliji jwakuŵajilwa kuŵa mwenye.
Daudi ni Sauli
Ligongo cici jumo mwa ŵanduŵa jwam’ŵengaga mjakwe, soni ana jwakuŵenjedwajo jwalosisye ndamo syatuli?
Kulupicika Soni Kulimba Mtima kwa Yonatani
Mwanace jwa mwenye jwaŵele mjakwe jwambone jwa Daudi.
Cakulemwa Caŵatesile Mwenye Daudi
Kusagula mwakulemweceka kukusayikasya yakusawusya yejinji.
