Zoova mannin Salomɔn i ngwlɛlɛ dan. Kpɛkun ɔ mɛnnin i atin kɛ ɔ kplɛn i sua’n. Sanngɛ blɛblɛblɛ Salomɔn wa yacili Zoova sulɛ. Sɛ amun le ba’n, amun ukɛ i naan ɔ wun wafa nga be nga be suman Zoova’n be yoli maan Salomɔn tɔli sa tɛ yolɛ’n nun’n. Izraɛli famiɛn diwlɛ’n i nun wa buli nɲɔn. Famiɛn klunwifuɛ wie mun be sieli Izraɛli nvle’n, yɛ be yoli maan amuin sɔlɛ’n nin sa tɛtɛ yolɛ’n be truli nvle’n nun. Blɛ sɔ’n nun’n, be kleli Zoova i nuan ijɔfuɛ kpanngban be yalɛ, yɛ be kunnin wie mun. Famiɛn bla Zezabɛli yoli maan Izraɛli i nglo lɔ lika’n i nunfuɛ mun be fali be wun wlali amuin sɔlɛ’n nun kpa. Blɛ sɔ’n nun’n, Izraɛlifuɛ mun be yoli sa tɛ dan. Sanngɛ sran wie mun be liɛ’n be suli Zoova kpa. Be nun wie yɛle Famiɛn Zozafati nin Ɲanmiɛn nuan ijɔfuɛ Eli.