Ginhatagan ni Jehova si Solomon sing dalayawon nga kaalam kag responsibilidad nga magtukod sing templo, pero amat-amat sia nga nagpalayo kay Jehova. Kon isa ikaw ka ginikanan, ipaathag sa imo bata kon paano ang mga nagasimba sa butig nga mga dios nagpahilayo kay Solomon sa Dios. Natunga ang ginharian, kag bangod sa malain nga mga hari naglapnag ang apostasya sa pungsod kag ang mga tawo nagsimba sa mga diosdios. Sa sini nga tion, madamo sa mainunungon nga manalagna ni Jehova ang ginhingabot kag ginpatay. Naglala pa gid ang apostasya sa naaminhan nga ginharian bangod kay Rayna Jezebel. Malain gid yadto nga bahin sang kasaysayan sang Israel. Pero madamo gihapon nga Israelinhon ang matutom nga nag-alagad kay Jehova, lakip na si Hari Jehosapat kag si manalagna Elias.