Yehowa gaw Shawlumon hpe grai hpaji rawng hkra shaman chyeju jaw nna, nawku htingnu gawgap na matu mung ahkang jaw ai. Raitim, hpang e shi gaw Yehowa hpe kau da wa ai. Nang gaw kanu kawa rai yang, sumla nawku ai ni gaw Shawlumon hpe Karai Kasang hte tsan mat hkra, gara hku galaw wa ai lam hpe na a ma ni chye hkra tsun dan ya u. Israela mungdan gaw lahkawng garan mat ai. N kaja ai hkawhkam ni gaw, mung masha ni hpe makam masham htak mat hkra galaw nna, gawng ngu sumla nawku ai lam hta woi awn ma ai. Dai aten laman, Yehowa hpe sadi dung ai myihtoi law law gaw, zingri zingrat hkrum nna sat pyi sat hkrum ma ai. Hkawhkam Jan Yezebela gaw dingdung Israela mungdan hpe makam masham htak mat hkra galaw wa ai. Dai aten gaw, Israela labau hta yak dik htum aten re. Raitim, Israela ni a lapran hta Yehowa hpe sadi dung ai mayam ni naw nga ai. Dai hta, Hkawhkam Yehosahpat hte myihtoi Elia mung lawm ai.