Jehova nĩ aarathimire Suleimani na ũũgĩ mũingĩ mũno na akĩmũhe mweke wa gwaka hekarũ, ĩndĩ nĩ aatigire Jehova kahora kahora. Angĩkorũo ũrĩ mũciari, taarĩria mwana waku ũrĩa ahoi a mĩhianano maatũmire Suleimani eyeheranie na Ngai. Ũthamaki nĩ wagayũkanire na Athamaki oru makĩingĩria rũrĩrĩ rwa Isiraeli ũhoi-inĩ wa ngai cia maheeni na ũkararia. Mahinda-inĩ macio anabii aingĩ a Jehova nĩ maanyaririrũo na makĩũragwo. Jezebeli, ũrĩa warĩ mũtumia wa mũthamaki wa mĩhĩrĩga ĩrĩa ikũmi ya Isiraeli, nĩ aatũmire Aisiraeli marikĩre mũno ũkararia-inĩ. Maarĩ mahinda maritũ mũno historĩ-inĩ ya Isiraeli. No nĩ kwarĩ na ndungata nyingĩ njĩhokeku cia Jehova thĩinĩ wa Isiraeli, ta Mũthamaki Jehoshafatu na mũnabii Elija.