ယဟိဝၤ​ယွၤ​ဆိၣ်ဂ့ၤ စီၤ​ၡလိၤမိၤ​ခီဖျိ​လၢ ဟ့ၣ်လီၤ​အီၤ​တၢ်ကူၣ်သ့ ဒီး​တၢ်ခွဲး​တၢ်ယာ်​လၢ က​သူၣ်ထီၣ်​ဝဲ​တၢ်လုၢ်ဟံၣ်​လီၤ. ဘၣ်ဆၣ် ဒ်​တၢ်​ဆၢကတီၢ်​လဲၤ​ပူၤကွံာ်ဝဲ​အသိး စီၤ​ၡလိၤမိၤ​ပာ်တ့ၢ်​ကွံာ် ယဟိဝၤ​ယွၤ​လီၤ. န​မ့မ့ၢ်​မိၢ်ပၢ်​န့ၣ် တဲ​နၢ်ပၢၢ်​န​ဖိ​လၢ ပှၤလၢ​အ​ဘူၣ်ထီၣ်​ဘါထီၣ်​ကစၢ်​ယွၤ​လၢ အ​ကမၣ်​တဖၣ်​န့ၣ် မၤ​ဟးဂီၤ​စီၤ​ၡလိၤမိၤ အ​တၢ်​ရ့လိာ်သး​ဒီး ယဟိဝၤ​ယွၤ​ဒ်လဲၣ်​အဂ့ၢ်​န့ၣ်​တက့ၢ်. လၢခံ​န့ၣ် အံၣ်စရ့လး​အ​ဘီမုၢ် လီၤဖး​ဝဲ​ခံ​က့​လီၤ. ဒီး​စီၤပၤ​လၢ​အအၢ​တဖၣ် စးထီၣ်​ပၢတၢ် ဒီး​ဆှၢ​ကမၣ်​ယွၤ​အ​ပှၤ​ဂီၢ်မုၢ်​လၢ က​ဘူၣ်ထီၣ်​ဘါထီၣ်​ဝဲ တၢ်ဂီၤ​တၢ်ဖှီၣ်​န့ၣ်​လီၤ. ဖဲ​န့ၣ်​အဆၢ​ကတီၢ် ယဟိဝၤ​ယွၤ​အ​ဝံ​လၢ​အတီ​တဖၣ် ဘၣ်​တၢ်​မၤအၢ​မၤသီ​ဒီး ဘၣ်​တၢ်​မၤသံ​အဝဲသ့ၣ်​လီၤ. နီၢ်ပၤမုၣ်​အံၤစ့ဘ့ၤလး ဆှၢ​ကမၣ်​ပှၤ​အံၣ်စရ့လး​ဖိ​အဒူၣ်​တဆံ​လၢ က​ဘူၣ်ထီၣ်​ဘါထီၣ်​ဝဲ ကစၢ်​ယွၤ​လၢ​အ​ကမၣ်​န့ၣ်​လီၤ. ဘၣ်ဆၣ် လၢ​ပှၤ​အံၣ်စရ့လး​ဖိ​အကျါ​န့ၣ် ပှၤလၢ​အတီ​ဒီး​ယဟိဝၤ​ယွၤ အိၣ်​ဒံးဝဲ​အါဂၤ ဒ်သိး​ဒီး စီၤပၤ​ယဟိၡၤဖး ဒီး​ဝံအ့ၤလံယၤ​လီၤ.