Yehova wāesele Solomone na kumupa tunangu tuvule ne dyese dya kūbaka tempelo, inoko aye wāsonsolokele Yehova bityebitye. Shi wi mbutwile, shintulwila obe mwana batōtyi ba bubela mobāsonsolwedile Solomone kulampe na Leza. Bulopwe bwaābanibwe, kadi balopwe babi bātwejeje muzo wa Isalela mu bupondo ne mu butōtyi bwa bilezaleza. Mu kine kitatyi’kya, bapolofeto bavule bādi balamete Yehova bādi bebapangapanga ne kwibepaya. Yezebele, mulopwe mukaji, wātwejeje bininge bulopwe bwa ku ngala mu bupondo. Kyāikele kitatyi kya fukutu mu mānga ya Isalela. Inoko, kwādi kukidi bengidi bavule ba Yehova ba kikōkeji mu bukata mwa bene Isalela, kubadila’mo ne mulopwe Yehoshafata ne mupolofeto Ediya.