Jiova kitatiochiuij Salomón ika miak tamatilis uan kiixpejpenak maj kichijchiua templo. Sayoj ke Salomón yolik kikaujtiyajki Dios. Komo tikonpia konemej, xikonmelauili ke akin kinueyichiuayaj tiotsitsin kichiujkej maj Salomón kikauani Jiova. Tekiuajyot moxeloj, uan moajsikej tekiuanij akin amo yolkualmej akin kichiujkej maj israelitas kinueyichiuanij tiotsitsin. Itech nejon tonalmej, miakej itanauatijkauan Jiova akin amo kikauayaj kintajyouiltijkej uan kinmiktijkej. Tekiuaj Jezabel kichiuak maj akin pouiaj itech tekiuajyot Israel okachiok kiixnamikinij Jiova. Nejon tonalmej semi ouijkej katkaj itech xolal Israel. Maski ijkon, moajsiajok miakej israelitas akin kisentokayaj kitekitiliayaj Jiova, kemej tekiuaj Jehosafat uan tanauatijkej Elías.