Jehofa o ile a nea Solomone bohlale bjo bogolo gomme a mo nea le mošomo wa bohlokwa wa go aga tempele, eupša ge nako e dutše e eya, Solomone o ile a tlogela go hlankela Jehofa. Ge e ba o le motswadi, hlalosetša ngwana wa gago kamoo batho bao ba bego ba rapela medimo ya maaka ba ilego ba dira gore Solomone a se sa rapela Jehofa. Mmušo wa Isiraele o ile wa tšwa diripa tše pedi, gomme dikgoši tše mpe tša dira gore setšhaba se hlanogele Modimo le go rapela medimo ya maaka. Ka yona nako yeo, baporofeta ba bantši ba Jehofa ba be ba tlaišwa gomme ba bangwe ba bolawa. Mohumagadi Isebele o ile a dira gore batho ba mmušong wa ka leboa wa Isiraele ba hlanogele Modimo kudu. Bophelo bo be bo le thata ka nako yeo. Lega go le bjalo, go be go sa dutše go na le bahlanka ba bantši bao ba botegago ba Jehofa, e lego batho ba go swana le Kgoši Jehoshafate le moporofeta Eliya.