Yehova akaha Sulemaani obwengye bwingi kandi yaamuha obujunaanizibwa bw’okwombeka hekalu, kwonka mporampora akarekyera aho kuheereza Yehova. Waaba ori omuzaire, shoboororera omwana waawe oku abantu abaabaire bari omu kuramya kw’ebishuba baareetaire Sulemaani kuruga ahari Ruhanga. Obugabe bukabaganisibwamu, kandi abagabe babi bakareetera ihanga eryo kuruga omu kuramya okw’amazima baatandika kuramya ebishushani. Omu bwire obwo, baanabi ba Yehova baingi bakahiiganisibwa kandi baitwa. Omugabekazi Yezebeeli akareetera ab’omu bugabe bw’obukiizi-bwa-bumosho kwejumbira kimwe omu nyegyesa z’ebishuba. Obwo bukaba buri obwire bubi omu byafaayo bya Israeli. Kwonka hakaba hariho baingi abaabaire bakiri abaheereza ba Yehova abeesigwa omu Baisraeli, otwariiremu Omugabe Yehoshafaati na nabi Eliya.