Gyihova maanle Sɔlɔmɔn nwunle nrɛlɛbɛ kpole na ɔnyianle nwolɛ adenle ɔzile ɛzonlenlɛ sua ne, noko ngyikyi ngyikyi ɔhwenle ɔ nwo ɔvile Gyihova anwo. Saa ɛle awovolɛ a, kilehile kɛzi adalɛ ɛzonlenlɛma hwenle Sɔlɔmɔn vile Nyamenle anwo la anu kile ɛ ra ne. Belemgbunlililɛ ne anu hyɛle nwiɔ, na arelemgbunli amumuyɛma maanle maanle ne zonlenle awozonle. Wɔ mekɛ ɛhye anu, bɛyɛle Gyihova ngapezoma dɔɔnwo kpɔdekpɔde na bɛhunle bɛ. Belemgbunli Raalɛ Gyɛzɛbɛle maanle sɔlɔ belemgbunlililɛ ne hwenle ɔ nwo vile Gyihova anwo kpole kpalɛ. Ɔle mekɛ mɔɔ ninyɛne angɔ boɛ fee wɔ Yizilayɛ a. Noko ɛnee Gyihova azonvolɛ mɔɔ di nɔhalɛ la dɔɔnwo tɛbɔ Yizilayɛ, bie a le Belemgbunli Gyɛhɔhyafate nee ngapezonli Yilaegya.