Inikdan nen Jehova si Solomon na agnaparaan ya karunongan tan sikatoy pinili ton manpaalagey na templo, balet kalkalna ton tinaynan si Jehova. No sakey kan ateng, ipaliwawa ed anak mo ya inmarawi si Solomon ed si Jehova lapud naimpluensyaan na saray mandadayew ed dios ya aliwan tua. Naapag ed duara so panarian, tan nan-apostata tan nandayew ed imahen o idolo iray Israelita lapud saray mauges ya ari da. Diad saman et dakel ya matoor ya propeta nen Jehova so pinairap tan pinatey. Nagmaliw ya grabe so apostasya ed panarian ed norte lapud impluensya nen Reyna Jezebel. Makapaermen iman ya panaon ed Israel. Balet dakel nin siansia so Israelitan matoor ya nandayew ed si Jehova, singa si Arin Jehosafat tan si propetan Elias.