Siohwa ketin kapaiahki Solomon erpit laud oh ketikihong ih pwais kaselel en kauwada tehnpaso, ahpw kedekedeo e kesehla Siohwa. Ma kowe pahpa de nohno men, kawehwehiong noumw seri ia duwen irail tohnkaudok likamw kan ar kahrehiong Solomon en sohpeisang Koht. Wehio nehnehpeseng, oh nanmwarki suwed kan me kahrehiong wehio en kin uhwong kaudok mehlel oh uhd kaudokiong dikedik kan. Erein ahnsowo, tohto soukohp loalopwoat kan en Siohwa kin lelohng uhwong oh kamakamala. Lih nanmwarki Sesepel kahrehiong wehin paliepeng kan ar kalaudehla ar uhwong kaudok mehlel. Ahnsowo wia ahnsou suwed ehu nan poadopoad en Israel. Ahpw mihete sapwellimen Siohwa ladu lelepek tohto nanpwungen mehn Israel kan, iangahki Nanmwarki Seosopat oh soukohp Elaisa.