Na faamanuiaina e Ieova Solomona i le tele o le atamai, ma tuuina atu iā te ia le faaeaga o le fausiaina o le malumalu. Peitaʻi na faasolosolo lava ona ia tuua Ieova. Pe afai o oe o se matua, ia faamatala i lau tama pe na faapefea i tagata na tapuaʻi i atua sesē ona liliueseina Solomona mai i le Atua. Na vaeluaina le malo, ma na taʻitaʻia e tupu leaga le nuu ina ia fulitua i le tapuaʻiga moni ma tapuaʻi atu i tupua. A o faagasolo lenā vaitaimi, e toʻatele perofeta faamaoni a Ieova na sauāina ma fasiotia. Na taaʻina e le masiofo o Iesepela le malo i le itu i mātū ina ia atili ona fulitua i le tapuaʻiga moni. O se vaitaimi leaga lea i le talafaasolopito o Isaraelu. Ae sa toʻatele lava isi tagata Isaraelu sa faamaoni pea iā Ieova, e aofia ai le tupu o Iosefatu ma le perofeta o Elia.