Naʻe tāpuakiʻi ʻe Sihova ʻa Solomone ʻaki ʻa e poto lahi pea ʻoange kiate ia ʻa e monū ko hono langa ʻo e temipalé, ka naʻe faifai atu pē ʻo ne liʻaki ʻa Sihova. Kapau ko ha mātuʻa koe, fakamatalaʻi ki hoʻo kiʻi tamá ʻa hono fakatafokiʻi ʻe he kau lotu loí ʻa Solomone mei he ʻOtuá. Naʻe mavaeua ʻa e puleʻangá, pea naʻe taki ʻe he ngaahi tuʻi koví ʻa e puleʻangá ke tafoki ʻo fakafepaki ki he moʻoní pea lotu ki he ʻaitolí. Lolotonga ʻa e taimi ko ení, naʻe fakatangaʻi mo tāmateʻi ʻa e kau palōfita mateaki tokolahi ʻa Sihová. Naʻe fakamālohiʻi ʻe Kuini Sisipeli ʻa e tafaʻaki tokelau ʻo e puleʻangá ke nau kau lahi ange ki he tafoki ʻo fakafepaki ki he moʻoní. Ko ha taimi kovi ʻaupito ia ʻi he hisitōlia ʻo ʻIsilelí. Ka naʻe kei ʻi ai pē ʻa e kau sevāniti faitōnunga tokolahi ʻa Sihova ʻi he kau ʻIsilelí, ʻo kau ai ʻa Tuʻi Sihosafate mo e palōfita ko ʻIlaisiaá.