Lembe ma nwang’ere i thenge mir 9
I thenge maeni, wabiponjo lembe iwi aradu moko, iwi jubila man jubim ma gitimo lembe m’unyutho nia gibino ku yioyic ma yawe mbe i Yehova. Ku lapor, i ng’om mi Cami, nyathi nyaku moko ma Nyaisrael ubino ku yioyic nia jabila pa Yehova copo keyo kum Naman. Jabila Elica uyio m’umbe jiji nia Yehova copo gwoke kara udul mony mi judegine kud gitime rac. Yehoiada ma tie Jalam ma dit uketho kwo pare i ariti kinde m’egwoko jalawobi moko ma nyinge Yoac kara wang’umire ma Athalia kud unege. Ubimo Hezekia ubino ku genogen nia Yehova bibodho Yerusalem, eno uketho emiyere ngo ni Juacur m’ubino nyayu lworo i ie. Ubimo Yosia ukabu thier mir ayi gin m’acwia ceke kud i ng’om pare, eyiko hekalu man edwoko thek mi Yuda kendo i thier mandha.
LEMBE M'I THENGE MAENI
PONJI MI 51
Jakiedlwiny moko ma tek man nyathi nyaku moko
Nyathi nyaku moko ma tie Nyaisrael unyutho ni dhaku m’ebedo i bang’e pi tego ma yawe mbe ma Yehova tie ko—eno umio adwogi ma ber mandha.
PONJI MI 52
Magali mi mac pa Yehova
Ang’o m’ukonyo jatic pa Elica nineno nia ‘ju ma gin’i bang’wa sagu ju ma ni kugi?’
PONJI MI 53
Tegocwiny pa Yehoiada
Jalam moko m’ugwoko bedoleng’ pare ujai i kum ubimo moko ma dhaku.
PONJI MI 54
Yehova unyutho cirocir ni Yona
Pirang’o rec ma dit ugam umwonyo jabila pa Mungu moko? Ewok kud i recne nenedi? Man Yehova umio ire ponji ma kani?
PONJI MI 55
Malaika pa Yehova ugwoko Hezekia
Judegi mi dhanu mi Yuda giyero nia Yehova bigwoko ngo dhanu pare, ento giwondiri!
PONJI MI 56
Yosia umaru Cik pa Mungu
Yosia udoko ubimo kinde m’ebino ku oro abora, man ekonyo dhanu pare kara gitim thier ni Yehova.
