Akpáxwé elɔ kplɔ́n nǔ mǐ dó mɛ winnyawinnya, gbeyiɖɔ kpo axɔsu kpo ɖěɖee ɖè nùɖiɖi nukúnɖeji xlɛ́ ɖò Jehovah mɛ lɛ é wu. Ðò Silíi ɔ, nyɔnuví Izlayɛlinu ɖé ɖó nùɖiɖi ɖɔ gbeyiɖɔ Jehovah tɔn na gbɔ azɔn e jɛ wɛ Naamani ɖè é. Gbeyiɖɔ Elizée ɖó jiɖe mlɛ́mlɛ́ ɖɔ Jehovah na cyɔn alɔ emi jí, bo hwlɛn emi ɖò kɛntɔ́ lɛ sín ahwangɔnu ɖé sí. Vɔsanúxwlémawutɔ́ Ðaxó Yexoyada sɔ́ gbɛ̀ tɔn ɖó axɔ nu, bo mɔ tɛn dó hwlɛn Joasi e kpò ɖò vǔ é sín gǎn’maa tɔn nǔnyanyawatɔ́ Atalíi sí. Axɔsu Ezekiyasi ɖeji ɖɔ Jehovah na hwlɛn Jeluzalɛmu, b’ɛ sín enɛ wu bɔ é jó gbè ɖò adǎngblɔ́nnúmɛ Asilíi tɔn nukɔn ǎ. Axɔsu Joziyasi ɖè vodunsinsɛn sín tò ɔ mɛ, vɔ́ tɛmpli ɔ blóɖó bo bló bɔ akɔta ɔ lɛ́ jɛ sinsɛn nugbǒ ɔ bló jí.